Андижон вилояти Шаҳрихон туманида маҳаллаларда ижтимоий-маънавий муҳит барқарорлигини таъминлаш, отинойилар фаолияти самарадорлигини ошириш масалаларига бағишланган маънавий-маърифий тадбир бўлиб ўтди. Бу ҳақда ЎзА хабар бермоқда.
Ўзбекистон мусулмонлари идораси вилоят вакиллиги, вилоят хотин-қизлар қўмитаси, туман ҳокимлиги ҳамкорлигида ўтказилган тадбирда туманлардаги 76 маҳалла фуқаролар йиғинларининг отинойилари, имом-хатиблар, маҳалла фаоллари иштирок этди.
Тадбирда вилоят бош имом-хатибининг хотин-қизлар масалалари бўйича ёрдамчиси Саодатхон Расулова, Ўзбекистон мусулмонлари идорасининг масъул котиби Майрамхон Абдуллаева, «Хадичаи Кубро» қизлар мадрасаси мударриси Муҳаррамхон Қутбиддинова муқаддас Рамазон ойининг фазилатлари, мамлакатда Президент ташаббуси билан диний йўналишда кенг кўламли ишлар олиб борилаётгани, шунингдек, ибодат, диний арконларни бажаришда кенг имкониятлар яратиб берилаётганини алоҳида таъкидлади.
— Маҳаллалардаги ижтимоий-маънавий, диний муҳит барқарорлигини таъминлашда отинойининг роли ниҳоятда катта, — дейди Шаҳрихон тумани бош отинойиси Муқаддасхон Солиева. — Чунки ҳар бир ишда маҳалла аҳли унга эргашади, қулоқ солади. Шу маънода, тадбирни ўтказишдан кўзланган асосий мақсад ҳам отинойиларнинг бугунги кун нафаси билан яшашга, ишлашга, янада фаол бўлишига кўмаклашишдан иборат.
Тадбирда аҳоли, айниқса, ёшларнинг турли диний оқимлар таъсирига тушиб қолишининг олдини олиш, тўй-ҳашам, маърака ва бошқа маросимларни ихчам ва камчиқим ўтказишга эришиш, бу борада отинойиларнинг масъулиятини ошириш зарурлиги қайд этилди.
Иштирокчиларни қизиқтирган саволларига мутасадди ва мутахассислар томонидан батафсил жавоб қайтарилди.
Изоҳ (0)