Ёшлар иттифоқи Фарғона вилояти кенгаши кафиллиги остида билиб-билмай жиноят кўчасига кириб қолган 4 нафар йигит озод қилинди. Бу ҳақда «Дарё»нинг Фарғонадаги мухбири Азизжон Эрматов хабар берди.
Эндигина 24 ёшга тўлган Телмон Толибов Учкўприк туманидан. У ҳамқишлоқлари И.Турсунов, Ж.Иномжонов ҳамда А.Тошпўлатов билан бирга жиноий тил бириктириб, босқинчилик жиноятини содир этган. Айбланувчиларга нисбатан Жиноят Кодексининг 164-моддаси (босқинчилик) 3-қисми «в» банди билан жиноят иши қўзғатилган.
Учкўприк туманида ўтказилган сайёр суд мажлисида Жиноят ишлари бўйича Фарғона вилояти суди томонидан мазкур жиноят иши кўриб чиқилди.
Суд жараёнида жамоат ҳимоячиси, Ўзбекистон Ёшлар иттифоқи вилоят кенгаши раиси Аҳаджон Акбаров томонидан судланувчиларга нисбатан озодликдан маҳрум қилиш билан боғлиқ бўлмаган жазо тайинлаш, келгусида ушбу фуқароларни кафилликка олиш таклифи билдирилди ва бу ҳақда кафолат хати тақдим қилинди.
Суд айбланувчиларнинг муқаддам судланмагани, қилмишидан чин кўнгилдан пушаймонлиги, жабрланувчи томоннинг даъвоси йўқлигини инобатга олиб, уларга нисбатан қўлланилган озодликдан маҳрум қилиш билан боғлиқ жазони бекор қилди ва судланувчилар Ёшлар иттифоқи кафиллиги остида суд залидан озод этилди.
Суд томонидан айбланувчиларга 4 йил озодликни чеклаш жазоси тайинланди.
Изоҳ (0)