Ўзбекистон Европа Иттифоқидан янада кўпроқ имтиёзлар олишга ҳаракат қилади

Ташқи савдо вазири Жамшид Хўжаев бошчилигидаги Ўзбекистон делегацияси Брюсселга жўнаб кетди. Бу ҳақда вазирлик матбуот хизмати маълум қилди, дея хабар беради «Халқ сўзи».

Делегация Ўзбекистон — Европа Иттифоқи Ҳамкорлик кенгашининг 15-мажлисида ва Евроиттифоқ иқтисодиёт, савдо ва инвестициялар бўйича қуйи қўмитаси 13-мажлисида иштирок этади. Тадбирлар 5—8 июнь кунлари бўлиб ўтади.

Делегация таркибига Инвестициялар бўйича давлат қўмитаси раиси ўринбосари Шуҳрат Вафоев, Инсон ҳуқуқлари бўйича миллий марказ директори Акмал Саидов, «Ўзтўқимачиликсаноат» уюшмаси раиси Илҳом Ҳайдаров ва Адлия вазири ўринбосари Акбар Тошқулов кирган.

Ташриф давомида Европа Иттифоқи мамлакатлари ишбилармонлари доиралари — Фландрия инвестиция ва савдо агентлиги, Европа савдо-саноат палаталари уюшмаси, Валлония экспорт ва инвестиция агентлиги вакиллари, шунингдек, Европарламент депутатлари билан учрашувлар ўтказиш режалаштирилган.

Бундан кўзланган мақсад Европа Иттифоқидан кўпроқ тариф преференциялари олишдир. Айни пайтда Ўзбекистон Евроиттифоққа 3000 номдаги товарни давлат божисиз ва 3200 та маҳсулот турини пасайтирилган ставкаларда экспорт қилиш имкониятига эга.