Андижон шаҳар ҳокимлигининг мажлислар залида халқ депутатлари шаҳар кенгаши депутатлари, шаҳардан сайланган вилоят кенгаши депутатлари, вилоят ички ишлар бошқармасининг соҳавий хизматлари раҳбарлари ҳамда жамоатчилик вакиллари иштирокида йиғилиш бўлиб ўтди. Бу ҳақда ИИВ жамоатчилик ва ОАВ билан алоқалар бошқармаси хабар берди.
Мажлисни Андижон шаҳар ҳокими, халқ депутатлари шаҳар кенгаши раиси Дилмурод Раҳматуллаев очиб берди ва олиб борди. Кун тартибидаги масала юзасидан Ички ишлар вазири генерал-майор Пўлат Бобожонов сўзга чиқди.
Вазир ўз чиқишида ўтган тўрт ой мобайнида шаҳардаги мавжуд 83 та маҳалланинг 37 тасида жиноят содир этилганлиги, шундан 8 тасида жиноятлар сони ортганлиги, вояга етмаганлар томонидан 8 та жиноят содир этилганлиги бу борада кенг жамоатчилик билан тушунтириш-тарғибот ишларини янада кучайтириш зарур эканлигини таъкидлади.
Муқаддам судланган шахслар билан олиб борилган ишлар талаб даражасида ташкил этилмаганлиги, айрим шахслар томонидан қайта жиноят содир этилишига йўл қўйилганлигини ҳамда содир этилаётган жиноятларни очиш эмас, уларнинг барвақт олдини олиш ва фуқаролар онгида жиноятчиликка қарши муҳит яратиш бугунги куннинг талаби эканлигига эътибор қаратди.
Шундан сўнг кун тартибидаги ташкилий масала кўриб чиқилди. Андижон шаҳар ички ишлар бошқармаси бошлиғи вазифасини бажарувчи этиб тайинланган полковник Саидкарим Нишонбоев шаҳар кенгаши фаолларига таништирилди.
Изоҳ (0)