Самарқандда хато туфайли битта ер ҳам мактабга, ҳам боғчага ажратилгани, натижада табдиркорлар орасида баҳс келиб чиққани ҳақида хабар берилган эди.
ЎзАга ушбу масала юзасидан Самарқанд шаҳар ҳокимининг саноатни ривожлантириш, капитал қурилиш, коммуникациялар ва коммунал хўжалик масалалари бўйича ўринбосари Бобур Элмуродов имзоси билан суратлар илова қилинган хат келиб тушди.
Хатда жумладан, шундай ёзилади:
Мақолага жавобан шуни маълум қиламизки, ҳақиқатда, Самарқанд шаҳар ҳокимининг 2017 йил 30 январдаги 114-Қ-рақамли қарори билан Oazis Samarkand масъулияти чекланган жамиятига товон тариқасида Самарқанд шаҳри, Амир Темур кўчасидаги «Ёш оилалар шаҳарчаси» ҳудудидан 1350 квадрат метр ер майдони ажратилиб, замонавий мактаб биноси қурилишига рухсат берилган.Oazis Samarkand масъулияти чекланган жамияти юристи Ф.Шукруллаев ҳам Самарқанд шаҳар ҳокими Фурқат Раҳимов масалани жойида бориб ўргангани ва аҳоли билан суҳбатлашиб, муаммо ижобий ечим топганини қайд этди.Мақолада баён этилган «2012 йил мазкур ҳудуддаги собиқ автомобиль эҳтиёт қисмлари бозори бузилганда шу ерда фаолият кўрсатган тадбиркорлардан бирига ушбу ер майдони мактабгача таълим муассасаси қуриш учун ажратиб берилган»и масаласи юзасидан шуни маълум қиламизки, шаҳар ҳокимининг 2012 йилдаги қарорига мувофиқ автомобиль эҳтиёт қисмлари бозори ҳудудида бузилишга тушган савдо дўкони ўрнига фуқаронинг аризасига асосан «Амир Темур кўчасида қурилаётган «Ёш оилалар шаҳарчаси» ҳудудидан ўз маблағи ҳисобидан болалар боғчаси қурилишини лойиҳалаштириш учун ажратилган ер майдони далолатномаси» тасдиқланган. Ушбу қарорнинг 3-бандида «лойиҳалаштириш учун ажратилган ер майдони далолатномасини тасдиқлаш тўғрисидаги қарор ер майдонидан фойдаланиш ёки қурилиш ишларини бошлаш учун асос ҳисобланмайди», деб белгилаб қўйилган.
Oazis Samarkand масъулияти чекланган жамияти товон сифатида ажратилган майдонда қурилиш ишларини бошлаш учун аҳоли норозилиги масаласи ҳам атрофлича ўрганиб чиқилди.
Самарқанд шаҳар ҳокими Фурқат Раҳимов 2018 йил 28 май куни соат 17:00 да тегишли мутасаддилар билан бирга қурилиш белгиланган жойга бориб, аҳоли ҳамда тадбиркор билан суҳбатлашди. Аҳолининг розилиги олингач, 2018 йил 29 май куни товон сифатида ажратилган 1350 квадрат метр ер майдонида Oazis Samarkand масъулияти чекланган жамияти томонидан қурилиш ишлари бошланди.
Изоҳ (0)