«Тошкент» халқаро аэропортида Куала Лумпур — Тошкент рейси бўйича парвозини якунлаган фуқаро Й.Н. божхона назоратидан ўтар экан, йўловчи божхона декларациясида ўзи билан 4 турдаги 20 дона ёввойи қуш ҳамда 10 бош бенгал ёввойи ўрмон мушугини олиб келганлиги қайд этди. Бу ҳақда Божхона қўмитаси ахборот хизмати хабар берди.
У мазкур жониворларни олиб кириш Экология ва атроф-муҳитни муҳофаза қилиш давлат қўмитаси томонидан бериладиган рухсатномалар асосида амалга оширилишини унутган кўринади. Боз устига, қўмита экспертларнинг хулосасига кўра, олиб келинган ёввойи жониворлар орасидаги 2 турдаги 4 дона тўти ҳамда 10 бош бенгал ёввойи ўрмон мушуги боласи йўқ бўлиб кетиш хавфи остидаги ҳайвонлар туркумига кириши аниқланди. Шу сабаб уларни божхона чегараси орқали олиб ўтишда халқаро SITEС рухсатномаси ҳам бўлиши лозим эди.
Мазкур ҳолатга аниқлик киритгунга қадар ушбу жониворлар Тошкент ҳайвонот боғига вақтинча сақлаш учун топширилди. Аммо бу жараёнда ташиш қоидаларига риоя этилмаганлиги сабабли ёввойи қушларнинг 2 донаси ўлиб қолганлиги маълум бўлди.
Халқаро нормаларга кўра, ёввойи ҳайвонларни ташиш учун мўлжалланган контейнерлар муайян талабларга жавоб бериши лозим. Ҳар бир қафасга жониворлар 1 донадан жойлаштирилиши, уларда оҳур, сувдон, дам олиш токчаси, вентиляция тешиклари бўлиши лозим. Бироқ фуқаро Й.Н.нинг ушбу оддий, аммо муҳим талабларга риоя қилмаганлиги қимматга тушди.
Ташиш қоидаларига етарлича риоя этилмаганлиги ёввойи бўлса-да, табиатан нозик бўлган жониворларга таъсирини ўтказмай қолмади. Тошкент ҳайвонот боғи ходимларининг саъй-ҳаракатларига қарамай, кейинчалик 7 бош бенгал ёввойи ўрмон мушуги боласи ва 2 турдаги 8 дона ёввойи қуш ҳам ҳалок бўлди.
Изоҳ (0)