“Toshkent” xalqaro aeroportida Kuala Lumpur — Toshkent reysi bo‘yicha parvozini yakunlagan fuqaro Y.N. bojxona nazoratidan o‘tar ekan, yo‘lovchi bojxona deklaratsiyasida o‘zi bilan 4 turdagi 20 dona yovvoyi qush hamda 10 bosh bengal yovvoyi o‘rmon mushugini olib kelganligi qayd etdi. Bu haqda Bojxona qo‘mitasi axborot xizmati xabar berdi.
U mazkur jonivorlarni olib kirish Ekologiya va atrof-muhitni muhofaza qilish davlat qo‘mitasi tomonidan beriladigan ruxsatnomalar asosida amalga oshirilishini unutgan ko‘rinadi. Boz ustiga, qo‘mita ekspertlarning xulosasiga ko‘ra, olib kelingan yovvoyi jonivorlar orasidagi 2 turdagi 4 dona to‘ti hamda 10 bosh bengal yovvoyi o‘rmon mushugi bolasi yo‘q bo‘lib ketish xavfi ostidagi hayvonlar turkumiga kirishi aniqlandi. Shu sabab ularni bojxona chegarasi orqali olib o‘tishda xalqaro SITES ruxsatnomasi ham bo‘lishi lozim edi.
Mazkur holatga aniqlik kiritgunga qadar ushbu jonivorlar Toshkent hayvonot bog‘iga vaqtincha saqlash uchun topshirildi. Ammo bu jarayonda tashish qoidalariga rioya etilmaganligi sababli yovvoyi qushlarning 2 donasi o‘lib qolganligi ma’lum bo‘ldi.
Xalqaro normalarga ko‘ra, yovvoyi hayvonlarni tashish uchun mo‘ljallangan konteynerlar muayyan talablarga javob berishi lozim. Har bir qafasga jonivorlar 1 donadan joylashtirilishi, ularda ohur, suvdon, dam olish tokchasi, ventilyatsiya teshiklari bo‘lishi lozim. Biroq fuqaro Y.N.ning ushbu oddiy, ammo muhim talablarga rioya qilmaganligi qimmatga tushdi.
Tashish qoidalariga yetarlicha rioya etilmaganligi yovvoyi bo‘lsa-da, tabiatan nozik bo‘lgan jonivorlarga ta’sirini o‘tkazmay qolmadi. Toshkent hayvonot bog‘i xodimlarining sa’y-harakatlariga qaramay, keyinchalik 7 bosh bengal yovvoyi o‘rmon mushugi bolasi va 2 turdagi 8 dona yovvoyi qush ham halok bo‘ldi.
Izoh (0)