Москвада очилган «Рамазон чодири»да Ўзбекистон кечаси бўлиб ўтди. Бу ҳақда Sputnik хабар бермоқда.
Соат 18:00 га яқин бу ерга Москванинг турли бурчакларидан мусулмонлар оқиб кела бошлади. 500 кишига мўлжалланган улкан чодирнинг ичи бир зумда одамга тўлди. Келганларнинг барчаси ифторда иштирок этишлари учун чодир ташқарисида ҳам бир неча столлар қўйилди.
Столлар устида ифторлик учун тайёрлаб қўйилган хилма-хил таомлар, нон, сомса ва сув қўйилган, кўнгилли хизмат қилувчи ёш йигит-қизлар ликопчалар тўла патнислар билан столлар оралаб тинимсиз ҳаракатланар эди.
Чодир марказида ўрнатилган саҳнадан маданий-маърифий маърузалар, жонли ижро этилаётган чиройли қўшиқлар ҳамда катта экранда намойиш этилаётган қизиқарли видеолавҳалар меҳмонларни бир зум ҳам зериктирмади.
Саҳнадан диний уламолар, Москва шаҳар маъмурияти вакиллари, Ўзбекистонга зиёрат сайёҳатлари уюштирувчи компания вакиллари ҳамда меҳнат мигрантларига кредитлар берувчи ташкилотлар вакиллари нутқ сўзлади.
Бу сафарги тадбир Москвадаги Ўзбекистон элчихонаси, ўзбек миллий-маданий автономияси, бир неча тижорат компаниялари томонидан, шунингдек, оддий мусулмонларнинг хайр-эҳсонлари эвазига ташкил қилинди.
Изоҳ (0)