Апрель ойи охирида Тошкент шаҳар ҳокими вазифасини бажарувчи этиб тайинланган Жаҳонгир Ортиқхўжаев шаҳар марказидаги етти қаватли маъмурий бино иштирокидаги кимошди савдосини тўхтатди. Бу ҳақда ЎзА хабар бермоқда.
Аввалроқ, 20 апрель куни Spot нашри халқ орасида «Газета корпуси» номи билан таниқли бино 18,2 миллиард сўмлик бошланғич нарх билан кимошди савдосига қўйилгани ҳақида хабар берган эди.
Шундан сўнг ЎзА ушбу бино шаҳар ҳокимлиги томонидан «Тошбозорсавдо»ни ривожлантириш мақсадида олинган 15 миллиард сўм миқдоридаги кредит учун гаровга қўйилганини аниқлади.
Кредит муддати якунига етганига қарамай, қарзга олинган маблағ қайтарилмаган, оқибатда бино, у билан бирга бино ичидаги ресторан ҳам кимошди савдосига қўйилган.
ЎзАнинг ёзишича, ҳоким вазифасини бажарувчи Жаҳонгир Ортиқхўжаев бинони аукционда сотиш жараёни тўхтатилганини маълум қилган. E-ijro Auksion сайтида ҳам лот йўқолиб қолган. Кредит ва бино тақдири нима бўлиши ҳозирча номаълум.
Изоҳ (0)