«Аҳмад-тема бўлиб кетяпти деб айтгандим». Чинозда 191 млн сўмлик қорамолни «еб юборган» даллоллар ушланди

Тошкент вилоятининг Чиноз ва Янгийўл туманларидаги аҳолининг қорамоллари учун бозор нархидан кўпроқ пул ваъда қилиб, қорамолларни ҳам, уларнинг сотувидан тушган пулларни ҳам ўзлаштириб юборган шахслар қўлга олинди.

«Тошкент» телеканалининг «Пойтахт-Вазият» кўрсатувида маълум қилинишича, жиноий гуруҳ жами 11 нафар фуқаронинг 191 миллион сўмлик қорамолларини алдов йўли билан қўлга киритиб, ўзлаштириб юборган.

Гуруҳнинг ёш аъзоси — 1999 йилда туғилган А.Акрамов ўз вақтида шериги — Б.Ҳожиевни қилаётган ишлари чинозлик Аҳмадбойникига ўхшаб кетаётганидан огоҳлантирган, бироқ Б.Ҳожиев бу олди-сотди экани, «ишнинг бу томонига аралашмаслик»ни маслаҳат берган.

Мазкур ҳолат юзасидан Чиноз туман ИИБ ҳузуридаги Тергов бўлими томонидан А.Акрамов ва Б.Ҳожиевга нисбатан Жиноят кодексининг 168-моддаси 3-қисми «а» ва «б» бандлари билан иш очилган, тергов ҳаракатлари давом этмоқда.