«Бизга уй кредит асосида эмас, балки Президент томонидан шундоқ совға қилинди». Шавкат Мирзиёевга хат ёзиб, беш хоналик квартирали бўлган ўқувчи ТВга интервью берди (видео)

Яқинда ижтимоий тармоқларда 14 ёшли Худойберган Азизов Президент Шавкат Мирзиёевга очиқ хат ёзиб, онаси билан ижарама-ижара яшашга мажбур бўлаётганини айтгани ва Давлат раҳбаридан уларни уй-жой билан таъминлашни сўрагани ҳақида хабарлар пайдо бўлган эди.

Янгийўл туманидаги 4-мактабда таълим оладиган ўсмир ўз хатида ёрдамга мухтож аёлларга квартира берилиши ҳақида қарор чиққани, унинг оиласи уй учун ойма-ой пул тўлашга қурби етишини ёзган эди. Унинг ушбу мактуби Президентга етиб бориб, сўрови қаноатлантирилди. «Ёшлар» телеканалининг «Давр» информацион дастури мухбирлари Худойберган ва унинг онаси билан суҳбатлашди.

Президентимга ёзган хатимда онамнинг қийналганликлари, квартирама-квартира кўчиб юрганликларимиз ҳақида, бу ҳолатдан онам баъзи вақтларда йиғлагани ҳақида ёзган эдим. Мана шу масала ижобий ҳал бўлганидан кейин, ўзим ҳам роса хурсанд бўлдим, онам ҳам роса хурсанд бўлдилар.

Фейсбукда жуда ҳам кўплаб постлар қолдиришди. Уларнинг ҳаммасига раҳмат айтмоқчиман. Улар мени қўллаб-қувватлаб туришди. Уй берилиб, раҳматнома ёзганимдан кейин ҳам ҳамма табриклар йўллашди. Ҳаммаларига раҳмат айтмоқчиман.

Уй кредит асосида эмас, балки Президентимиз томонидан шундоқ совға қилинди. Бунинг учун Президентимизга ҳам катта раҳмат айтмоқчиман. Меҳнатдан қочмайман. Келгусида, катта бўлганимдан кейин, Ватанимга хизмат қиламан.

Катта бўлганимда биринчи ўринда институтга кириб, яхши ўқиб, онамни хурсанд қилмоқчиман. Ўқитувчи касбини эгаллаб, болаларга билим бериб, ўзимнинг яхши ўқитувчиларимга ўхшаган ўқитувчи бўлмоқчиман.

Худойберган Азизов, мактаб ўқувчиси

14 йилдан бери ҳар беш-олти ойда ижарама-ижара, кўчиб-кўчиб яшаб келаётган эдик. Ўғлим хат ёзганида уйли-жойли бўлишимизга ўзим ҳам ишонмаган эдим. 24 соат ичида Президентимиз уй совға қилдилар.

Саодат Азизова, Худойберганнинг онаси