«Қашқадарё зиёкори» газетасида журналист Отабек Қўлдошевнинг мансабдор шахсларнинг амалдаги қонунчиликни яхши билмаслиги ва журналистларга нисбатан беписанд муносабатда бўлиши ҳақидаги мақоласи чоп этилди. Қуйида ушбу мақола эътиборингизга ҳавола этилади.
Илгари аҳён-аҳёнда қулоғимизга чалинадиган бир гапни бугун деярли ҳар куни эшитяпмиз.«Журналист сифатида ахборот олиш учун фалон ташкилотга борганимда буйруғим бор-йўқлиги-ю, ташкилотга киришга қанчалик ҳаққим борлиги билан қизиқишди». Тўғриси, эшитиб таажжубланардик. Ўзимиз ҳам шу аҳволга тушгунга қадар...Таълим тизимидаги ўзгаришлар ва соҳадаги янгиланишларни оммалаштириш мақсадида навбатдаги хизмат сафари билан Шаҳрисабзга йўл олдик. Шаҳрисабз туман Халқ таълими бўлимига бориб, мудир Шуҳрат Рўзиевнинг қабулига кирдик. Одатдаги салом-аликдан сўнг бўлим мудирига мақсадимизни баён қилдик.
«Бугун эрталабдан барча ишларимизни режалаштириб, ходимларни топшириқ билан жўнатганман. Иш услубим шунақа. Ҳозир уларни қайтиб чақириб ололмайман, — деган бўлим мудирининг гапини эшитиб, албатта ҳурматимиз ошди.
Бемаврид келганимиздан ҳижолат ҳам бўлдик. Мудир жаноблари «қовун туширмагунча», албатта. Бўлим мудирининг «Кейинги сафар бошқармамиз бошлиғидан буйруқ олиб келинг, — деган гапи у ҳақидаги барча фикрларим ўзгаришига сабаб бўлиб, раҳбар республика қонунларини билмайди ёки менсимаяпти деган савол туғилишига сабаб бўлди. Азбаройи бу ҳақда эшитмаганим учунми, бўлим мудиридан вилоят Халқ таълими бошқармаси бошлиғи ОАВга қандай буйруқ бериши билан қизиқдим-у, ҳамма томошага гувоҳ бўлиб қолдим-да. Сиз 5 дақиқа чиқиб туринг, мен бошқарма билан гаплашиб қандай буйруқ кераклигини билиб бераман, деган суҳбатдошимизни нақ 20 дақиқа пойладик.Сўнгра ёнига киргач, унинг «узр мен сизларни бошқа газетага алмаштирибман, сизлар бошқа газета экансизлар», деган гапи дард устига чипқон бўлди. Наҳотки, туманда нуфуси жиҳатидан кенг қамровга эга бўлган ташкилот раҳбари газеталарнинг фарқига бормаса. Оммавий ахборот воситаларини шу таҳлид бир-биридан айро кўрса?
Ўзбекистон Республикаси Конституциясининг 67-моддасида белгилаб қўйилган Оммавий ахборот воситалари эркиндир ва қонунга мувофиқ ишлашини, «Оммавий ахборот воситалари тўғрисида»ги ва «Ахборот олиш кафолатлари ва эркинлиги тўғрисида»ги»ги Қонунларимизни ақалли эшитмаган бўлса-я? Тўғриси, бўлим мудирининг бу каби қонунларимизни билмаслигидан заррача ҳам ажабланмадим. Нега дейсизми? Боиси, туман Халқ таълими бўлими раҳбари давлат Конституциясининг ҳар ким бепул билим олиш ҳуқуқига эга эканлигини англатувчи 41-моддасини ҳам билмагач, «қўлимни ювиб қўлтиғимга урдим». Туман ХТБ вакилларига журналистик фаолиятимиз хусусида тушунтириб улгурмасимиздан, ижодий жамоамизни туман ҳокимлигидан ҳоким ўринбосари Бекзод Назаров ҳам йўқлаб қолди.
Хайрият, бизни тушунадиган кишилар ҳам бор экан, дея туман ҳокимлиги томон ошиқдик. Туман ҳокимлиги вакиллари ОАВ қонунчилигидан яхши хабардордир десак, «чучварани хом санаган эканмиз». Аслида ёмғирдан қочиб, дўлга тутилибмиз.«Сиз, бизнинг туманимизга киришингиздан олдин вилоят ҳокимлигининг мутасадди раҳбарларидан буйруқ олиб келишингиз керак бўлади, ана шундагина биз ахборот олишингизга рухсат берамиз, - дея иш фаолиятимизга эътироз билдирди Бекзод Назаров. Тушунтиришга қанча тиришмайлик, фойдаси бўлмади. Ҳоким ўринбосари намуна қилиб кўрсатиш учун ёрдамчисига «Дунё бўйлаб» телеканалининг Наврўз байрамини ёритиш бўйича келган буруғини излашини буюрди. Бир нималарни қидириб кетган ёрдамчи бир зум тўхтаб, нимани сўраётганимиз билан қизиқди. Буйруқ ҳақида эшитгач, бундай буйруқ уларга келмаганлигини, вилоят ҳокимлигидан тавсия хати борлигини айтиб қолди. Аммо шуни ҳам кўрсатолмади. Қизиқ, туман ҳокимининг ўринбосари буйруқ ва хатнинг фарқига бормаяптими? Вилоят ҳокимлигининг матбуот хизмати билан боғланиб, туман ҳокимлигининг талаби ҳақида ҳам билдирдик. Матбуот хизмати вакили бу борада уларнинг талаби ўринсиз эканлиги айтгач, яна Бекзод Назаровнинг қабулига кирдик. Бу сафар ҳоким ўринбосари буйруқ эмас, хатни сўраётганлигини айтиб қолди.
Ажабо. Эмишки, ҳар бир ОАВга вилоят ҳокими ўринбосарлари ёки шу соҳага даҳлдор вакиллари ўрганиши мумкинлиги хусусида хат бериши керак экан. Мана сизга туман мутасаддисининг тушунчаси, савияси...
Шу ўринда савол туғилади? Туман ҳокими ўринбосари Бекзод Назаров ва туман ХТБ мудири Шуҳрат Рўзиев Ўзбекистон Республикаси Конституциясини, «Оммавий ахборот воситалари тўғрисида»ги, «Ахборот олиш кафолатлари ва эркинлиги тўғрисида»ги Ўзбекистон Республикаси Қонунларидан бехабарми ёки менсимайдими? Агар билса ёки хабардор бўлса нега журналист фаолиятига тўсқинлик қилади? Нега уни овора қилиб, уни олиб кел буни олиб кел дея сарсон-саргардон бўлишига сабабчи бўлади. Биз ўша куни ижодий жамоамиз билан эрталаб соат 09:00 дан 15:00 қадар шу масалада мутасадди раҳбарлар эшиги тагида сарғайдик. Мутасаддилардан «рухсат теккач», тақиқнинг сабабларидан бирини билгандек ҳам бўлдик.
Тумандаги 28-умумтаълим мактабида туман ХТБнинг икки нафар вакили Олим Алиқулов ва Дадахон Негматов билан биргаликда мактаб директорининг ўқув ишлари бўйича ўринбосари Тошкан Чоршанбиевнинг 3-синф ўқувчиларига спиртли ичимлик истеъмол қилган ҳолда дарс ўтаётганига гувоҳ бўлдик. Бўлим мудирига бу ҳақда билдириб, ўзи кўриб гувоҳи бўлиши мумкинлигини айтдик.
Воқеага туман ХТБ кадрлар бўлими йўриқчиси Нўъмон Тўраев гувоҳ бўлди ва бу ҳақда тез орада чора кўришларини билдириб, таҳририятга ҳам маълум қилажагини айтди. Бироқ ХТБ масъуллари орадан қарийб бир ойга яқин муддат ўтса-да, сукут сақлашни лозим топишмоқда. Аслида ХТБ мудири ва туман ҳокими ўринбосари ОАВ фаолиятига тўсқинлик қилиб, шу каби иллатларнинг илдиз отишига замин яратиб бермаяптимикин? Балки, шунинг учун ҳам бугунги кунда жамиятимизда жиноятчилик авж олаётгандир. Ўйлаймизки, ушбу ҳолатга Шаҳрисабз туман ҳокими ҳамда вилоят ҳокимлиги масъллари муносабат билдиришади. Ва кўплаб журналистларни қийнаб келаётган муаммога ечим топилади. Биз эса ҳар доимгидек кутамиз ва кузатамиз...
Изоҳ (0)