Мудофаа вазирлиги ва Ёзувчилар уюшмаси ўртасида ҳамкорлик меморандуми имзоланди
Мудофаа вазирлиги билан Ёзувчилар уюшмаси ўртасида ҳарбий хизматчиларнинг маънавиятини ошириш масалалари бўйича ўзаро ҳамкорлик меморандуми ҳамда «Ёшларни ҳарбий-ватанпарварлик руҳида тарбиялаш борасидаги фаолиятни кучайтириш ҳамда тизимли равишда маънавий-маърифий ишларни ташкил этишга доир чора-тадбирлар тўғрисида»ги қарори имзоланди. Бу ҳақда Мудофаа вазирлиги матбуот хизмати хабар берди.
Тадбирда Ёзувчилар уюшмаси раиси Сирожиддин Саид ва Мудофаа вазирининг ўринбосари полковник Шуҳрат Холмуҳаммедов иштирок этди.
Ҳарбий хизматчилар ва ёшлар билан ҳарбий-ватанпарварлик тарбияси йўналишида кенг миқёсда тадбирлар уюштириш, уларнинг маънавий ва маърифий билимларини ошириш ҳамда мумтоз ва замонавий адабиётнинг энг сара намуналари мазмун-моҳиятини тушунтириб бориш мақсадида Мудофаа вазирлиги ва Ўзбекистон Ёзувчилар уюшмаси ўртасида ўзаро ҳамкорлик ишлари йўлга қўйилмоқда.
Бугунги икки томонлама муносабатларнинг истиқболларини белгилаш бўйича имзоланган ҳужжатларга мувофиқ Ўзбекистон Ёзувчилар уюшмаси ва Мудофаа вазирлиги ҳарбий хизматчилар ва ёшларни ҳарбий-ватанпарварлик руҳида тарбиялаш ҳамда билими ва маънавиятини ошириш борасидаги фаолиятини янада кучайтириб, ҳарбий қисм ва олий ҳарбий таълим муассасаларида, академик лицей ва касб-ҳунар коллежларида, хусусан, «Темурбеклар мактаблари»да тизимли равишда маънавий-маърифий ишларни ташкил этиш, икки томонлама манфаатли муносабатларни қўллаб-қувватлаш ва ривожлантириш мақсадида ҳамкорлик қиладилар.
Шу муносабат билан Ёзувчилар уюшмаси вилоят бўлимлари ҳамда Мудофаа вазирлиги ҳарбий қисм ва муассасалари ўртасида ўзаро ҳамкорлик ишлари ўрнатилиб, масъул шахсларнинг рўйхати шакллантирилди.
