Ўзбекистон Президенти Шавкат Мирзиёев Жанубий Корея раҳбари Мун Чжэ Инга мактуб йўллаб, унда Пханмунжомда ўтган Кореялараро саммит якунлари Ўзбекистон томонидан тўла қўллаб-қувватланишини билдирди. Мактуб матни Президент матбуот хизмати томонидан келтирилди.
«Сизни 2018 йил 27 апрель куни Пханмунжомда корейс халқи солномасида тарихий аҳамият қозонган Кореялараро саммитни ўтказганингиз билан самимий табриклайман», — дейилади мактубда.
«Жаҳон ҳамжамияти диққат марказида бўлган бу учрашувнинг улкан натижалари Сизнинг қатъий позициянгиз ҳамда Корея Республикаси ҳамда Корея Халқ-Демократик Республикаси ўртасидаги муносабатларни яхшилашга, глобал хавфсизлик ва барқарорликни таъминлашга, шунингдек, минтақада ўзаро ишончни мустаҳкамлашга қаратилган тинчликсевар курс реализацияси йўлидаги тинимсиз саъй-ҳаракатларингиз туфайли мумкин бўлди».
«Корея Республикасининг стратегик ҳамкори бўлмиш Ўзбекистон Республикаси корейс халқининг яқинлашиш, умумий тараққий ва гуллаб-яшнаш учун Корейс ярим оролида барқарорлик ва хавфсизликни таъминлаш йўлидаги амалий қадамларини бундан кейин ҳам кузатиб ва қатъий қўллаб-қувватлаб боради».
«Ишончим комилки, корейс халқининг айрилган оилаларнинг бирлашиши, алоқаларнинг тикланиши бўйича кўп йиллик орзулари амалга ошадиган, бу минтақа эса мустаҳкам тинчлик ва фаровонликка эга бўладиган муборак кун келади».
Изоҳ (0)