Июль ойининг охирига қадар Ўзбекистонда дарахтларни кесишга рухсат берилиши бўйича онлайн реестр ишга туширилиши лозим. Бу ҳақда журналистлар билан мулоқот чоғида Экология ва атроф муҳитни муҳофаза қилиш давлат қўмитаси раиси Баҳром Қўчқоров маълум қилди, деб хабар бермоқда «Газета.uz».
Дарахтларнинг ноқонуний кесилиши Тошкент ва бошқа шаҳарлар аҳолисини ташвишга солаётган жиддий муаммолардан биридир. Фуқаролар мунтазам равишда дарахтлар кесилиши устидан шикот қилади.
Йил бошидан буён жисмоний шахслардан бу борада 580 мурожаат келиб тушган. 2 мингдан ортиқ ҳуқуқбузарлик қайд этилган бўлиб, ҳуқуқбузарлардан ўсимлик дунёсига етказилган 1 миллиард сўм зарар ундирилган.
Қўмита расмий сайтида тегишли реестрнинг юритилиши 2014 йилги Вазирлар Маҳкамаси қарорида кўзда тутилган эди, аммо у шу пайтгача ишга туширилмади. Баҳром Қўчқоров қўмита тизимида ахборот-коммуникацион технологияларни жорий этишда муаммолар мавжудлигини тан олди.
«Муаммони ҳал қилиш учун АКТ жорий этиш маркази ташкил этилди. Ҳозир сайт ва дарахтларни кесишга рухсат берилиши акс этадиган тизим устида ишламоқдамиз. Ҳозир бу ҳокимитлар орқали амалга оширилади, улар дарахт кесилишига рухсат беради, биз бу рухсатномаларни жойлаштириб бориш устида ишламоқдамиз. Одамлар билиши учун, улар дарахт кесилиши қонуний ёки ноқонуний кетаётганини билиш учун бизга мурожаат этади», — таъкидлади амалдор.
Изоҳ (0)