ЎзАда журналист Ғолиб Ҳасановнинг «Шудгорланган йўл ёхуд сабр қилинг, ҳайдовчилар» сарлавҳали мақоласи чоп этилди. Ушбу мақолада Самарқанд вилоятидаги йирик бозорлардан бири Ургут бозори яқинидаги йўлнинг аянчли аҳволи танқидга олинади. Қуйида мақола ўз ҳолича эътиборингизга ҳавола этилади.
Сиз суратда кўриб турган бу йўл – расман 4R-47 «Булунғур шаҳри – Ургут шаҳри-M-39» автомобиль йўли деб номланади. Суратлар ушбу йўлнинг 60-80-километрида, яъни Ургут шаҳри ва Кенагас қишлоғи оралиғида олинган.
Лекин аҳоли, ургутликлар бу йўлни «тухум флейкаси», «дастурдан четдан қолган йўл», «шудгорланган йўл» деб номлашади. Бунинг боисини шу йўлдан бир бор ўтган йўловчи яхши билади. Аммо 20 километрлик бу йўл атрофидаги Мерганча, Камангарон, Қинғир, Сариқтепа, Нисбат, Деҳқонобод, Равот, Кенагас каби қишлоқларнинг минглаб аҳолиси, истаса-истамаса, ҳар куни мана шу ўйдим-чуқур йўлдан юришга мажбур. Бундан ташқари, «Жаҳон бозори» номини олган Ургут бозори ҳам шу йўл бўйида жойлашган. Бозорга ҳар куни юзлаб машина ўтиб қайтади.
Бир неча йилдирки, Самарқандда республика йўл хўжалиги мутасаддилари ёки турли вазирлик, қўмиталар масъуллари ва депутатларнинг аҳоли билан учрашувлари, мулоқотларида доим мазкур йўлнинг ҳолати бўйича мурожаатлар бўлади, масала кўтарилади. Лекин ҳар сафар жавоб бир хил – «дастурга киритиш бўйича таклиф берамиз» ёки «келгуси йил дастурига киритилади».
Яқинда биз ҳам аҳолининг мурожаатлари асосида йўлнинг ҳолати тўғрисида мақола тайёрлаш мақсадида Ургут тумани ҳокими ўринбосарига мурожаат қилдик. Ҳар тугул ўринбосар жавобидан кўнглимиз тўлди – «Йўл жорий йилги дастурга кирган, иш бошланди». Бу гапдан сўнг Ургутга сафаримизни бошқа кунга қолдирдик ва йўлнинг таъмирланиш жараёнини ёритишни режалаштирдик.
Орадан ўн кунлар ўтиб, режалаштирган мавзуни ёритиш учун Ургут томон йўл олдик.
M-39 йўлидан Ургут шаҳри томон ўша таъмирланаётган йўлга бурилдик. Минг афсус, йўлнинг ҳолати суратда кўриб турганингиздек, ҳамон чанг, транспорт воситалари қатнов қисми қолиб, йўл четидаги нисбатан текис жойдан ҳаракатланмоқда. Кўприклар ўша-ўша – таъмирталаб, бетон тўсиқлари тушиб кетган. «Таъмирланаётган» йўлнинг бирор жойида техника ишлаётгани, тош-шағал ёки қум тўкаётганини кўрмадик. Фақат ушбу йўлдан Сариқтепа маҳалласига бурилишда ички йўлда йўл хўжалиги транспорт воситалари ишлаётганига кўзимиз тушди.
«Жорий йилда мазкур йўл дастурга киритилиб, таъмирлаш ишларини олиб бориш учун 44 миллиард сўм ажратилган. Қурилиш-таъмирлаш ишларини амалга оширадиган пудратчи аниқлангани йўқ. Пудратчи бўлмаганидан кейин шартнома ҳам, муддат ҳам аниқ эмас. Лекин биз дастлабки ишларни бажаряпмиз. Йўлнинг 60—80-километрлари оралиғида 11 минг 700 квадрат метр жойга шағал тўшаб, текисладик. Дастур бўйича таъмирлаш ишлари 2018—2019 йилларда тўрт босқичда – 5 километрдан бажарилади. Ҳозирда илк лойиҳа-смета ҳужжатлари тайёрланиб, экспертизага берилган», — дейди Ургут тумани йўллардан фойдаланиш унитар корхонаси бошлиғи Эшмуҳаммад Аблоёров.
Корхона раҳбарининг айтишича, мазкур ташкилотнинг 13 та техникаси бор ва улар шу пайтгача имкон қадар ушбу йўлни текислаш ишларини бажарган (бу техника ва имконият билан 20 километрлик йўлни замон талаблари даражасига келтиришни тасаввур қилиш қийин). Айни пайтда эса корхона ишчи-хизматчилари Сариқтепа маҳалласидаги 1,8 километрлик ички йўлни таъмирлаш билан шуғулланмоқда.
Демак, ҳали 4R-47 «Булунғур шаҳри – Ургут шаҳри-M-39» автомобиль йўли ёки «тухум флейкаси»нинг соз ҳолатга келишини анча вақт кутишга тўғри келади. Чунки 2018 йилнинг тўртинчи ойи ҳам якунланмоқда, йўлнинг лойиҳа-смета ҳужжатлари эса экспертизада, ишни бажарадиган пудратчи аниқланмаган. Шундай бўлгач, қанақа хулосага келиш мумкин. Сабр қилинг, ургутлик ҳайдовчилар, деймиз холос.
Изоҳ (0)