Халқ депутатлари Фарғона вилоят, шаҳар ва туман Кенгашларига Ўзбекистон «Миллий тикланиш» демократик партиясидан сайланган депутатлар ўз ваколатидан тўлақонли ва унумли фойдаланишга интилиб, мавжуд масала ва муаммоларни ҳал этишга алоҳида эътибор қаратмоқда, деб хабар беради партия матбуот хизмати.
2018 йил биринчи чорагида маҳаллий Кенгашлардаги партия гуруҳи аъзолари томонидан қонун ва ҳукумат қарорларининг жойлардаги ижроси ҳамда фуқаролардан келиб тушган мурожаатлар асосида 134 та депутатлик сўрови юборилди. Мазкур сўровларнинг аксарияти халқ депутатлари Фарғона, Қўқон, Марғилон шаҳар, Қува, Данғара, Бешариқ туман Кенгашларидаги партия гуруҳи аъзолари томонидан амалга оширилди. Бу борада халқ депутатлари Бағдод, Олтиариқ, Фурқат, Сўх ва Қўштепа туман Кенгашларидаги айрим депутатлар ўз ваколатларидан унумли фойдалана олмади.
17 та депутатлик сўровига айрим корхона, ташкилот ва муассасалар мутасаддиларининг масъулиятсизлиги натижасида жавоб қайтарилмади.
Масалан, халқ депутатлари вилоят Кенгаши депутати, Муҳаммадали Юсуповнинг 2018 йил 22 январь куни Фурқат тумани Агробанк бошлиғи номига йўллаган сўровига ҳануз жавоб олингани йўқ.
Мазкур сўровда Фурқат тумани Эшон қишлоғида яшовчи Беҳзод Субхоновга тадбиркорлик фаолиятини кенгайтириш мақсадида кредит ажратиб бериш масаласи кўтарилган. Дарвоқе, сўров матнида депутат сўровига қанча муддатда жавоб қайтариши лозимлиги ва мазкур ҳолатда қонун бузилишига йўл қўйилиши, жавобгарлик белгиланганлиги эслатма тариқасида кўрсатиб ўтилган.
Бундан ташқари, халқ депутатлари Учкўприк туман Кенгашидаги ЎзМТДП гуруҳи аъзоси Абдусаматова Хожирахоннинг 2018 йил 12 мартда «Водийгазтаъминот» унитар корхонаси туман филиали бошлиғига юборган сўровига ҳам ҳеч қандай жавоб берилмади. Мазкур депутатлик сўровида тумандаги Сариқўрғон қишлоғидаги шошилинч тез тиббий ёрдам шохобчаси биносини газ билан таъминлашда амалий ёрдам кўрсатиш сўралган. Туман марказидан узоқлиги туфайли аҳолини долзарб муаммо юзасидан қайта-қайта йўллаган сўрови бееътибор қолдирилди.
Изоҳ (0)