9 май — Хотира ва қадрлаш куни муносабати билан Ўзбекистонда турли хил йўналишларда маънавий-маърифий, ватанпарварлик руҳидаги тадбирлар амалга оширилмоқда. Бу ҳақда Мудофаа вазирлиги матбуот хизмати хабар бермоқда.
Хусусан, Чирчиқ шаҳридан 85 километр узоқ масофада жойлашган Чирчиқ олий танк қўмондон муҳандислик билим юртининг бир гуруҳ ҳарбий хизматчилари томонидан «Мардлик, бурч ва садоқат» шиори остида Бўстонлиқ туманининг Бурчимулло қишлоғида ҳам ҳарбий тадбир ўтказилди.
Ҳарбий хизматчилар дастлаб, қишлоқдаги Иккинчи Жаҳон урушида ҳалок бўлган инсонлар хотирасига ўрнатилган ёдгорлик мажмуасида қишлоқнинг фахрий инсонлари билан учрашиб, Мотамсаро она ҳайкали пойига гул қўйди. Сўнг ҳарбий хизматчилар 40-сонли мактабга йўл олди.
Мактаб ҳудудида билим юрти томонидан ўқув нуқталари намойиши бўлиб ўтди. Қурол-аслаҳа, тоғ тайёргарлиги махсус анжомлари ҳамда билим юрти музейи томонидан ташкил этилган кўчма кўргазма ўқувчи-ёшларни ҳарбий соҳага нисбатан янада қизиқишларини оширди, ватанпарварлик туйғуларини мустаҳкамлади. Совет Иттифоқи даврида билим юрти фронтга жуда кўп ҳарбий кадрларни тайёрлаб берди. Ҳурлик замонанинг фарзандлари бўлмиш ўқувчилар ўша даврда жасорат ва қаҳрамонлик кўрсатган ҳарбийлар тўғрисида маълумот берувчи музей экспонатлари билан танишиш имконига эга бўлди.
Ҳарбийлар иштирокида синфхонада ўтказилган «Жасорат» дарсида ўқувчилар ўзларини қизиқтирган саволлар билан мурожаат этиб, тегишли жавобларни олди.
Изоҳ (0)