Ўзбекистон Республикаси Вазирлар Маҳкамаси ҳузуридаги Миллатлараро муносабатлар ва хорижий мамлакатлар билан дўстлик алоқалари қўмитаси вакилларидан иборат делегация яқинда Германияда хизмат сафарида бўлди, деб хабар беради ЎзА.
Сафар давомида Германиянинг қатор вазирлик ва идоралари раҳбарлари билан учрашувлар ўтказилди. Сиёсий, академик ва жамоатчилик доиралари вакиллари иштирокида давра суҳбати бўлиб ўтди. Бундан ташқари, делегация Делиcанто халқаро таомлар фестивалида иштирок этди, 2015 йилда Германияда ташкил этилган «Ниҳол» ватандошлар жамияти аъзолари билан учрашиб, ўзаро фикр алмашди.
Жамият аъзолари асосан Ўзбекистондан борган ёшлар, талабалар, илмий изланишлар қилаётган ёш олимлар ва Германиядаги немис корхоналарида ишлаётган йигит-қизлардан иборат. «Ниҳол» ватандошлар жамиятининг асосий мақсади икки давлат ўртасидаги маданий алоқаларни тиклаш, тажриба алмашиш, мулоқот қилиш орқали ҳамкорликни мустаҳкамлашдан иборат.
Ўзбек ёшлари Германияда илмий салоҳияти кучли мутахассислардан ҳисобланади. Ана шундай ёшлардан бири Камолиддин Бердиев. У Ўзбекистон Ёшлар иттифоқининг Германиядаги вакили ҳисобланади.
Камолиддин 15 йилдан бери Германияда яшаб мактабда немис тилидан сабоқ беради. У 10—16 апрель кунлари Тошкентда ўтказилган «Ёш ватандошлар» фестивалида Германиядан делегат сифатида қатнашди.
« ‘Ниҳол’ жамияти томонидан Германияда яшаётган ватандошларимиз билан алоқани йўлга қўйиш, уларга ўзбек тили, миллий маданиятимиз ва урф-одатларини эслатиб туришга қаратилган эзгу ишлар олиб борилади. Ушбу жамият Берлин шаҳрининг энг катта кутубхонасидан ижарага жой олган. У ерда ҳафтада бир кун ўзбек тили курслари ташкил қилинади. Германияда хозирги кунда 8 та ўзбек-немис жамиятлари фаолият олиб бормоқда. ‘Ниҳол’ жамияти улар билан ҳамкорлик алоқаларини ўрнатган», — дейди Камолиддин Бердиев.
Учрашувда Германияда яшаётган ўзбекистонлик ёшлар ўзларининг келгусидаги режалари, фикр-ўйлари ҳақида батафсил сўзлаб берди.
Изоҳ (0)