Ўзбекистон Республикаси Ички ишлар вазирининг маслаҳатчиси, генерал-полковник Зокиржон Алматов Бухорога ташриф буюрди. Зокиржон Алматов икки кунлик ташрифи давомида Бухоро вилояти Ички ишлар бошқармаси ва унинг жойлардаги қуйи тузилмалари томонидан вилоят ҳудудида ҳуқуқбузарликлар профилактикасини таъминлаш, жиноятларнинг олдини олиш борасида бошқа мутасадди ташкилот ва идоралар билан ҳамкорликда амалга оширилаётган ишлар билан танишди. Бу ҳақда Бухоро вилояти ИИБ матбуот хизмати хабар бермоқда.
Ташрифнинг илк кунида дастлаб меҳмонлар Баҳоуддин Нақшбанд зиёратгоҳида бўлиб, бу муборак қадамжода қуръон тиловат қилдилар. Шундан сўнг, Бухоро вилояти ИИБ Хавфсиз туризмни таъминлаш бошқармасининг ушбу мажмуада ташкил этилган бўлинмаси фаолияти билан яқиндан танишди.
Зокиржон Алматов ҳамда масъул ходимлар ташриф давомида Когон тумани Б.Нақшбанд маҳалла фуқаролар йиғинида фаолият кўрсатаётган профилактика инспектори катта лейтенант Вафо Чорақуловга берилган хизмат уйида ҳам бўлди.
Шу куннинг ўзида Бухоро шаҳридаги мусиқали ва драма театрида вилоят ички ишлар органларида хизмат қилиб келаётган ходимлар, узоқ йиллар ички ишлар органларида хизмат қилиб нафақага чиққан фахрийлар, вилоят фаоллари, ёшлар, шунингдек, маҳаллий ҳокимликлар вакиллари билан учрашув ўтказилди. Ушбу учрашувда Ўзбекистонда тинчлик ва осойишталикни таъминлаш, жиноят ва ҳуқубузарликларнинг олдини олишда ўзаро ҳамжиҳатликда амалга оширилиши лозим бўлган чора-тадбирлар белгилаб олинди. Шунингдек, Зокиржон Алматов узоқ йиллик юксак билим ва тажрибалари билан ўртоқлашди. Шундан сўнг, муҳташам санъат даргоҳига йиғилганлар ташриф давомида Зокиржон Алматовга ҳамроҳ бўлган, Ўзбекистон ва Қорақалпоғистон халқ артисти Ёдгор Саъдиевнинг ижодий чиқишлари ва дилтортар қўшиқларидан баҳраманд бўлди.
Ташрифнинг иккинчи кунида меҳмонлар Бухоро вилояти ИИБ хавфсиз туризмни таъминлаш бошқармасида яратилган шароитлар, шунингдек, патруль-пост хизмати баталони ҳамда алоҳида вазифаларни бажарувчи сафарбарлик отряди ходимларининг куч ва имкониятлари билан танишди.
Сўнгра, вилоятнинг Ғиждувон туманида йиғилган фаоллар ҳамда ички ишлар органлари ходимлари билан навбатдаги учрашув ташкил этилди. Мазкур учрашувда ҳам ягона мақсад-тинчлик ва ҳамжиҳатликни таъминлаш, жиноятчиликка буткул барҳам бериш бош масала сифатида қаралди. Ташриф якунида Зокиржон Алматов Ғиждувон туманидаги Абдухолиқ Ғиждувоний зиёратгоҳида бўлиб, у ердаги ободонлаштириш ва қурилиш ишлари билан танишди.
Изоҳ (0)