Наманган муҳандислик-технология институтида иқтидорли талабаларнинг «Инновацион лойиҳалар ва ишланмалар танлови» бўлиб ўтди. Бу ҳақда «Дарё»га журналист Оқилхон Дадабоев маълум қилди.
«Фаол тадбиркорлик, инновацион ғоялар ва технологияларни қўллаб-қувватлаш йили» Давлат дастури ижроси доираси ҳамда институтда илмий салоҳиятли кадрлар заҳирасини шакллантириш мақсадида ўтказилган ушбу танловда учта йўналиш бўйича 40 дан зиёд талаба иштирок этди.
Танлов ҳайъати томонидан ҳар бир қатнашчининг илмий ёндашувларга асосланган инновацион ғоя, ишланма ва лойиҳалари тақдимоти тингланиб, атрофлича ўрганиб чиқилди. Танловда намойиш этилган иссиқхоналар учун автоматик назорат қурилмаси, газ ва иссиқликдан огоҳлантирувчи қурилма, мактаб ўқувчилари учун янги турдаги мактаб формалари, ҳаво босимида ишловчи двигатель, автоматик қўнғироқ, қийин суғориладиганлар ерлар учун гидрогель моддаси, фермерлар учун кичик уруғ экиш мосламаси, матоларни синаш мосламаси каби истиқболли ишлар эътироф этилди.
Қайд этиш жоизки, танловда талабалар томонидан тақдим этилган 20 га яқин инновацион ишланма, 10 га яқин лойиҳа ва дизайнерлик ишларига кичик бизнес ва тадбиркорлик субъектлари, ишлаб чиқариш корхоналари ва фермерлар томонидан катта қизиқиш билдирилиб, ҳамкорликда иш олиб бориш бўйича келишувлар амалга оширилди.
— Танловда янги ассортиментдаги аёллар спорт кийими лойиҳаси билан иштирок этдим, — дейди институт енгил саноат технологияси факультети 4-курс талабаси Муаттар Саидалиева. — Тақдим этган моделларимиз республика текстил саноатида ўз нуфузига эга бўлган «Истиқлол дизайн маркази» масъулияти чекланган жамияти томонидан ишлаб чиқаришга жорий этиш реажалаштирилмоқда.
Профессор-ўқитувчилардан иборат ҳакамлар ҳайъатининг хулосасига кўра, танловнинг «Энг яхши инновацион ғоя муаллифи» номинацияси бўйича Нозимхон Аҳмедов (маҳаллий хом ашёлар ва чиқиндилардан тайёрланадиган қурилиш ғишти ва ёзув бори ғояси), «Энг яхши инновацион ишланма муаллифи» номинациясида Талъатжон Абдулҳакимов (юқори нам тортувчи гидрогел муаллифи) ва «Энг яхши инновацион лойиҳа муаллифи» номинациясида Шоҳрухмирзо Рауфов (мактаб ўқувчилари учун формалар лойиҳаси) ғолиб деб топилди.
Изоҳ (0)