Қозоғистоннинг Astana Group компанияси Ўзбекистон бозорига MEGA савдо-кўнгилочар марказлари тармоғини ва автомобиль брендларини киритишга тайёрланмоқда, деб ёзади Spot компания президенти Нурлан Смагуловга таяниб.
Унинг сўзларига кўра, компания Ўзбекистон бозорини қизиқарли ва жозибали деб ҳисоблайди.
«Ўзбекистон катта аҳоли — 30 миллион кишилик қизиқарли, жозибали бозор ҳисобланади. Устига-устак, у ерда иқтисодий ислоҳотлар бошланди, конвертация, бизнес либерализацияси эълон қилинди… Мен аллақачон Ўзбекистонга бориб, бозори билан танишиб келдим, у ҳажми ва банд эмаслиги, катта потенциал талаби билан ҳайратда қолдиради. Чунки Ўзбекистондаги оилалар кўп фарзандли, улар учун дам олиш кунини ўтказиш жуда муҳим, у ерда халқаро брендлар йўқ, уларни биз олиб боришимиз мумкин. Брендларнинг ўзлари бизга мурожаат қилиб, Ўзбекистон бозорига ҳамкорликда киришни таклиф қилмоқда», — деди Нурлан Смагулов.
«Бизга халқаро автомобиль брендлари ҳам мурожаат қилди. Улар биз билан бирга янги бозорга чиқишга тайёр… Ҳозир биз қонунчилик, инвестициявий иқлим билан танишиш жараёнидан ўтяпмиз ва бизнинг ходимларимиз вазиятни ўрганиш учун у ерга тез-тез бориб турибди. Биз контактлар ва музокаралар учун тайёрмиз», — дея қўшимча қилди бизнесмен.
Astana Group иқтисодиётнинг нохом ашё секторида — авторитейлда, тижорат кўчмас мулклари бозорида ишлайдиган корхоналарни бирлаштиради. Холдингнинг девелоперлик бўлинмаси — Mega Development — Қозоғистондаги энг йирик MEGA савдо-кўнгилочар марказлари тармоғини қуради ва ривожлантиради.
Изоҳ (0)