Фуқаро Кенжа Мусанов Ўзбекистонда ҳокимиятни эгаллаб олиш ёки конституциявий тузумни ағдариш мақсадида тил бириктирганликда айбланаётган Бобомурод Абдуллаев, Ҳаётхон Насриддинов, Шавкат Оллоёров ва Равшан Салаевнинг иши бўйича кўрсатмалар берган илк гувоҳ бўлди, деб ёзади «Газета.uz».
Мусанов Бобомурод Абдуллаев билан 2013 йилда танишган, у Абдуллаев бошқараётган таксига ўтирган, машинада улар турли мавзуларда суҳбатлашган. Абдуллаев одам ташиш билан шуғулланишини ва қўнғироқ қилса, уйига ҳам бориши мумкинлигини айтган. Улар телефон рақамлари билан айирбошлашган. «У мени уч-тўрт марта у ёқ-бу ёққа олиб борди, ҳар сафар ўзи қўнғироқ қиларди», — деди Кенжа Мусанов.
Мулоқотлари чоғида Абдуллаев Ўзбекистон ҳукумати ва сиёсатига нисбатан норозилик билдирган, Мусанов эса ҳар сафар уни тўхтатиб, ҳарбий хизматчи эканлигини ва бу мавзудаги суҳбатлар номақбул эканлигини айтган, аммо Абдуллаев гапиришда давом этган.
2013 йил декабрида Абдуллаев Мусановга қўнғироқ қилиб, тушликка танишиникига ошга боришни таклиф қилган. Абдуллаев билан Мирзо-Улуғбек туманидаги уйга киришганида уларни Ҳаётхон Насриддинов кутиб олган.
Абдуллаев ундан телефонини ўчириб, батарейкасини чиқариб қўйишни сўраган, аммо бундан шубҳаланган Мусанов хизмат бўйича чақириб қолишлари мумкинлиги туфайли телефонини ёниқ қолдирган. Овқатланиш вақтида сиёсатни салбий тарзда муҳокама қилиш бошланган. МХХ, Мудофаа вазирлиги, ИИВ раҳбарларини тилга олиб, куни келиб уларга асқотиши туфайли, уларнинг манзилларини аниқлаштириш кераклигини айтган.
Насриддинов планшет орқали Муҳаммад Солиҳ билан боғланган ва жамоага янги аъзо қўшилганини айтиб, Мусановни кўрсатган. «Агар уларнинг режасини амалга оширишда ёрдам берсам, менга Мудофаа вазирлигида юқори лавозим берилишини айтишди», — деди Мусанов.
«Мен раҳбариятга хабар бериш ҳақида ўйладим, аммо бу қандайдир текширув ёки ҳазил деб ўйлаб, хабар қилмадим. Бундай қилмаганимдан жуда афсусдаман», — деди у.
Суд мажлиси иштирокчиларининг саволларига жавоб берар экан, Мусанов суҳбат тафсилотларини эслай олмади. Шунингдек, учрашув вақтини ҳам айта олмади, аммо судланувчилар учрашув 17:00 га белгиланганини даъво қилмоқда. Томонлар, шунингдек, уйда қандай йиғилганлари ҳақида ҳам бир-бирига зид кўрсатмалар берди.
Мусанов Абдуллаев билан бошиданоқ фикрлари бир жойдан чиқмаган бўлса ҳам, такси хизматидан фойдаланиш учун у билан мулоқот қилишда давом этганини айтди. Бироқ ўзи ҳеч қачон қўнғироқ қилмаганини, чунки унинг телефон рақамини билмаганини таъкидлади. Раислик қилаётган судья Мусановдан Абдуллаев қўнғироқ қилган вақтда унга такси керак бўлишини қандай билганлиги ҳақида савол берди. «Шунинг учун айтаяпманки, мен унинг ҳамроҳ такси сифатидаги хизматидан фойдаланмадим. Мен ундан шунчаки мени у ёқ-бу ёққа обориб қўя олиш-олмаслигини сўрардим», — деди гувоҳ.
Кейинроқ Мусанов тергов чоғида берган кўрсатмалар у судда берган кўрсатмалардан фарқ қилиши маълум бўлди. Тергов чоғида у Насриддинов билан аввалдан таниш бўлганини, учрашув бўлган уйга борганида у кутиб олганини, Абдуллаев эса кейинроқ келганини ва у билан ўша ерда биринчи марта танишганини айтган.
Гувоҳ маълумотлар нима учун ўзгариб қолганини тушунмаётганлигини айтиб, суддаги кўрсатмалари рост эканлигини таъкидлади.
Мажлисда Ҳаётхон Насриддинов Мусановдан Мудофаа вазирлигидаги ҳарбий хизматчиларда ҳарбий-сиёсий тайёргарлик бўйича машғулотлар бўлиш-бўлмаслиги, уларни «ноқонуний аксилконституциявий ҳаракатлар» чоғида ўзларини қандай тутишга ўргатиш-ўргатмасликлари ҳақида сўради.
«Сиёсий эмас, маданий-маърифий машғулотлар бўлади. Бизга буни ўргатишмайди, яъни аниқ бир йўналишлар беришмайди. Ҳар бир ҳарбий хизматчи бундай вазиятларда ватанпарвар ва ҳарбий хизматчи сифатида ўзи онгли равишда ҳаракат қилади», — деди гувоҳ.
«Бундай ёмон ҳаракатни кўрган ватанпарвар қандай иш тутиши керак?» — деб сўради Насриддинов.
«Мен раҳбариятга етказишим керак эди, бироқ бу текширув ёки ҳазил эканлигини тушунмаганлигим учун хабар қилмадим. Бу менинг айбим», — деди Мусанов.
Адвокат Сергей Майоровнинг ўша уйдаги суҳбат ҳақида берган саволига жавоб берар экан, Кенжа Мусанов суҳбатни Ўзбекистонда конституциявий тузумни ағдариш таклифи сифатида қабул қилмаганини айтди.
Сергей Майоров нашрга маълум қилишича, айбланувчи томон ишда гувоҳ Мусановнинг иккита бир-бирини инкор этувчи кўрсатмаси борлигини талаб қилиб туриб олади. «Устига-устак, у айтаётган нарсалар мантиқсиз ва бир-бирига зид. Барча шубҳалар судланувчининг фойдасига талқин қилиниши керак», — деди ҳимоячи.
Изоҳ (0)