Тошкент шаҳрида 14 март куни Ўзбекистон матбуот ва ахборот агентлиги ҳамда «А2 Digital» МЧЖ ҳамкорлигида ташкил этилган «Инновацион технологияларнинг янги қирралари» мавзусидаги I Халқаро матбаа форуми бошланди.
Икки кун давом этадиган ушбу форумда АҚШ, Россия, Германия, Исроил, шунингдек Марказий Осиё давлатларидаги йирик матбаа корхоналарининг, жумладан дунёга машҳур HP VIP Systems ESKO, Scodix каби компанияларнинг вакиллари иштирок этмоқда.
Форумда қатнашаётган Ўзбекистон матбуот ва ахборот агентлиги тизимидаги, Қорақалпоғистон Республикаси, Тошкент шаҳри ва вилоятлардаги матбаа корхоналарининг раҳбарлари ва ходимлари мазкур йўналишдаги илғор хорижий тажриба, ижодий ғоя ва ишланмалар билан танишиш имкониятига эга бўлмоқда. Ўз навбатида чет эллик меҳмонларнинг «Ўзбекистон» ва Ғафур Ғулом номидаги нашриёт-матбаа ижодий уйлари ҳамда «А2 Digital» МЧЖ фаолияти билан яқиндан танишиши ҳам режалаштирилган.
Шунингдек, улар Ўзбекистонда матбаа соҳасини янги босқичга олиб чиқиш, хусусан, матбаа корхоналари фаолиятини янада ривожлантириш билан боғлиқ қимматли тавсия ва тажрибалари билан ўртоқлашади.
Форум доирасида Ўзбекистонда матбаачилик соҳасига тадбиқ этилган инновацион технологиялар ва эришилган натижалар, соҳанинг истиқболдаги ривожланиш тенденциялари хусусида назарий ва амалий мулоқотлар, тақдимотлар ва учрашувлар ташкил этилади.
Ўзбекистон матбуот ва ахборот агентлиги ҳам матбаачилик соҳасидаги ягона давлат сиёсатини амалга оширувчи ваколатли бошқарув органи сифатида инновацион ғоялар, ишланмалар ва технологияларни кенг жорий этиш, хизматлар соҳасини тубдан такомиллаштириш, шу орқали маҳсулотларнинг сифати, рақобатбардошлигини ошириш, бу борада давлат корхоналари билан бир қаторда, хусусий сектор фаолиятини қўллаб-қувватлаш ва ривожлантиришга ҳам алоҳида эътибор қаратиб келмоқда.
Кўрилаётган чора-тадбирлар боис агентлик тизимидаги «Ўзбекистон» нашриёт-матбаа ижодий уйида Марказий Осиёда ягона бўлган Германиянинг КBА компаниясида ишлаб чиқарилган 8 бўёқли чоп этиш ускунаси, Ғафур Ғулом номидаги нашриёт-матбаа ижодий уйида Heidelberg компаниясининг Speedmaster ofset усулида чоп этиш ускунаси ва бошқа бир қанча иш жараёнларини бошқаришда қулайлик яратадиган замонавий асбоб-ускуналар ўрнатилди.
Шу билан бир қаторда, «А2 Digital», «Kolor Pak», «Niso poligraf», Ofset Print, Sano-standart, Credo Print group каби хусусий корхоналар ҳам ишлаб чиқаришни модернизация қилиб, матбаа бозорида ўз ўрнига эга бўлмоқда. Улар томонидан ишлаб чиқарилаётган маҳсулотларга нафақат ички бозорда, балки ташқи бозорда ҳам харидорлар сони йилдан йилга ортиб бормоқда.
Матбаачилик соҳасига қаратилаётган эътибор натижасида ушбу соҳа фаолиятига замонавий техника ва технологиялар жорий қилинмоқда. Ёшлар, айниқса, ўқувчилар 3D форматли, интеграл муқовали дафтарларнинг беқиёс имкониятларидан унумли фойдаланиш имкониятига эга бўлмоқда.
Изоҳ (0)