Остонада Қозоғистон ва Ўзбекистон ўртасида икки томонлама ҳамкорлик бўйича ҳукуматлараро қўшма комиссиянинг 17-йиғилиши бўлиб ўтди. Йиғилишга Қозоғистон бош вазирининг биринчи ўринбосари Асқар Мамин ҳамда Ўзбекистон бош вазири биринчи ўринбосари Очилбой Раматов ҳамраислик қилди, деб хабар берди «Казинформ».
Учрашув давомида 2017 йил икки томонлама алоқалар учун муваффақиятли келгани таъкидлаб ўтилди. Маълумки, икки мамлакат президентлари Қозоғистон ва Ўзбекистон ҳукуматларига савдо-иқтисодий ҳамкорликни фаоллаштириш бўйича чора-тадбирларни кўриш борасида топшириқ берган.
Савдо-иқтисодий ҳамкорликнинг ривожланиш динамикасини ҳисобга олган ҳолда, томонлар товар айирбошлаш ҳажмини 2018 йилда 3 миллиард долларга ҳамда 2020 йилгача 5 миллиард долларгача ошириш бўйича келишилган чора-тадбирларни қабул қилишга келишиб олди.
Томонлар Қозоғистон ва Ўзбекистоннинг чегара ҳудудларида Халқаро трансчегаравий ҳамкорлик маркази, транспорт-логистика маркази («Қуруқ порт») барпо этиш имкониятларини муҳокама қилди.
Шунингдек, томонлар жорий йилнинг апрель ойидан бошлаб Самарқанд—Остона йўналиши бўйича мунтазам равишда йўловчи поездларининг ҳаракатланишига келишиб олди.
Бундан ташқари Марказий Осиёда трансчегаравий сув ресурсларидан фойдаланишнинг ҳуқуқий механизмини ишлаб чиқиш зарурлиги таъкидланди, бу эса барча давлатларнинг манфаатларини ҳисобга олган ҳолда конструктив мулоқот ўрнатиш имконини беради.
Изоҳ (0)