Аввал хабар берганимиздек, Ўзбекистонга Деҳли шаҳри жоме масжиди бош имоми, Ҳиндистондаги нақшбандия тариқати етакчиси Саид Аҳмад Бухорий бошчилигидаги делегация ташриф буюрди. Бу ҳақда «Халқ сўзи» маълум қилди.
Меҳмонлар мамлакатда ислом дини ривожи йўлида амалга оширилаётган ислоҳотлар билан танишиш, табаррук қадамжоларни зиёрат этиш, қадимий обидалар, тарихий ёдгорликларни кўздан кечиришни мақсад қилган.
Делегация аъзолари Тошкент ислом университетида бўлиб, бу ерда ўқитувчи ва талабалар учун яратилган шароитлар билан танишди.
— Ўзбекистонда ислом динини ривожлантиришга йўналтирилган ишлар таҳсинга лойиқ, — дейди Саид Аҳмад Бухорий. — Самарқандда Имoм Бухорий номидаги халқаро илмий-тадқиқот маркази, Тошкентда Ислом цивилизацияси маркази, Ислом академияси фаолиятининг йўлга қўйилиши дунё аҳли эътиборини яна бир бор Ўзбекистонга қаратди. Шавкат Мирзиёевнинг БМТ Бош Ассамблеяси 72-сессиясида сўзлаган нутқи бутун дунёда, жумладан, Ҳиндистонда катта қизиқиш билан кутиб олинди. Президент ислом дини эзгулик ҳамда тинчликка, асл инсоний фазилатларни асраб-авайлашга даъват этишини алоҳида таъкидлади, муҳим таклифларни ўртага ташлади. Хусусан, Шавкат Мирзиёевнинг БМТнинг «Маърифат ва диний бағрикенглик» деб номланган махсус резолюциясини қабул қилиш ташаббуси бутун ислом оламида қувонч, ғурур-ифтихор уйғотди. Ўйлайманки, ислом маданиятини тушунмоқчи бўлганлар, албатта, Ўзбекистонга келиши зарур. Бу ҳам илм, ҳам зиёрат бўлар эди.
Тадбир давомида меҳмонлар Тошкент ислом университетида сақланаётган халифа Усмон Мушафи нусхаси, Бурҳониддин Марғиноний ўз қўли билан ёзган «Ал-Ҳидоя» асари, таълим даргоҳида олиб борилаётган илмий изланишлар билан таништирилди.
Ташриф дастурига мувофиқ, меҳмонлар Дин ишлари бўйича қўмита раҳбарияти билан учрашув ўтказади. Ўзбекистон мусулмонлари идораси, Ислом цивилизацияси маркази, Ислом академияси фаолияти билан танишади. Шунингдек, Самарқанд, Бухоро, Хива, Термиз ҳамда Андижон шаҳарларида бўлади.
Маълумот учун, Деҳли шаҳри жоме масжиди катталиги жиҳатидан дунёда саккизинчи ўринда туради. Унинг қурилиши бобурийлар сулоласи вакили Шоҳжаҳон томонидан бошланиб, 6 йил давом этган. Масжидда бир вақтнинг ўзида 25 минг киши ибодат қилиши мумкин. Бу ерда 400 йилдан буён асли Марказий Осиёдан бўлган бухорийларнинг ўн уч авлоди хизмат қилиб келмоқда. Саид Аҳмад Бухорий ҳам ушбу силсиланинг давомчисидир.
Изоҳ (0)