Миллий хавфсизлик хизмати ходимлари Бош прокуратураси ҳузуридаги Солиқ, валютага оид жиноятларга ва жиноий даромадларни легаллаштиришга қарши курашиш департаменти билан биргаликда тақиқланган дори воситалари савдосига ихтисослашган гуруҳнинг фаолиятига чек қўйди. Бу ҳақда «Ўзбекистон 24» телеканалига асосланиб, «Газета.uz» хабар берди.
19 минг дона трамадол таблеткаларини (кучли қарамликка олиб келадиган психотроп дори воситаси) сотишга уринган икки нафар Қозоғистон ва Ўзбекистон фуқаролари қўлга олинган.
Уларнинг бирининг айтишича, мазкур дори воситалари доимий равишда контрабанда усули билан Қозоғистон фуқароси томонидан Ўзбекистон ҳудудига олиб кирилган. Битим вақтида Ўзбекистон фуқароси дориларни улгуржи харидор сифатида сотиб олиб, уни ўз фойдаси учун чакана савдо орқали сотишни режалаштирган.
Айни вақтда мазкур иш юзасидан тергов олди ҳаракатлари олиб борилмоқда.
Республика гиёҳвандликка қарши курашиш маркази маълумотларига кўра, 2015 йилда Ўзбекистонда илгари героинга қарамликдан азият чекиб, трамадол истеъмолига ўтган 104 нафар бемор даволанган бўлса, 2016 йилда ушбу кўрсаткич 130 дан ортиқни ташкил этган.
Изоҳ (0)