Toshkent shahrida 14-mart kuni O‘zbekiston matbuot va axborot agentligi hamda “A2 Digital” MChJ hamkorligida tashkil etilgan “Innovatsion texnologiyalarning yangi qirralari” mavzusidagi I Xalqaro matbaa forumi boshlandi.
Ikki kun davom etadigan ushbu forumda AQSh, Rossiya, Germaniya, Isroil, shuningdek Markaziy Osiyo davlatlaridagi yirik matbaa korxonalarining, jumladan dunyoga mashhur HP VIP Systems ESKO, Scodix kabi kompaniyalarning vakillari ishtirok etmoqda.
Forumda qatnashayotgan O‘zbekiston matbuot va axborot agentligi tizimidagi, Qoraqalpog‘iston Respublikasi, Toshkent shahri va viloyatlardagi matbaa korxonalarining rahbarlari va xodimlari mazkur yo‘nalishdagi ilg‘or xorijiy tajriba, ijodiy g‘oya va ishlanmalar bilan tanishish imkoniyatiga ega bo‘lmoqda. O‘z navbatida chet ellik mehmonlarning “O‘zbekiston” va G‘afur G‘ulom nomidagi nashriyot-matbaa ijodiy uylari hamda “A2 Digital” MChJ faoliyati bilan yaqindan tanishishi ham rejalashtirilgan.
Shuningdek, ular O‘zbekistonda matbaa sohasini yangi bosqichga olib chiqish, xususan, matbaa korxonalari faoliyatini yanada rivojlantirish bilan bog‘liq qimmatli tavsiya va tajribalari bilan o‘rtoqlashadi.
Forum doirasida O‘zbekistonda matbaachilik sohasiga tadbiq etilgan innovatsion texnologiyalar va erishilgan natijalar, sohaning istiqboldagi rivojlanish tendensiyalari xususida nazariy va amaliy muloqotlar, taqdimotlar va uchrashuvlar tashkil etiladi.
O‘zbekiston matbuot va axborot agentligi ham matbaachilik sohasidagi yagona davlat siyosatini amalga oshiruvchi vakolatli boshqaruv organi sifatida innovatsion g‘oyalar, ishlanmalar va texnologiyalarni keng joriy etish, xizmatlar sohasini tubdan takomillashtirish, shu orqali mahsulotlarning sifati, raqobatbardoshligini oshirish, bu borada davlat korxonalari bilan bir qatorda, xususiy sektor faoliyatini qo‘llab-quvvatlash va rivojlantirishga ham alohida e’tibor qaratib kelmoqda.
Ko‘rilayotgan chora-tadbirlar bois agentlik tizimidagi “O‘zbekiston” nashriyot-matbaa ijodiy uyida Markaziy Osiyoda yagona bo‘lgan Germaniyaning KBA kompaniyasida ishlab chiqarilgan 8 bo‘yoqli chop etish uskunasi, G‘afur G‘ulom nomidagi nashriyot-matbaa ijodiy uyida Heidelberg kompaniyasining Speedmaster ofset usulida chop etish uskunasi va boshqa bir qancha ish jarayonlarini boshqarishda qulaylik yaratadigan zamonaviy asbob-uskunalar o‘rnatildi.
Shu bilan bir qatorda, “A2 Digital”, “Kolor Pak”, “Niso poligraf”, Ofset Print, Sano-standart, Credo Print group kabi xususiy korxonalar ham ishlab chiqarishni modernizatsiya qilib, matbaa bozorida o‘z o‘rniga ega bo‘lmoqda. Ular tomonidan ishlab chiqarilayotgan mahsulotlarga nafaqat ichki bozorda, balki tashqi bozorda ham xaridorlar soni yildan-yilga ortib bormoqda.
Matbaachilik sohasiga qaratilayotgan e’tibor natijasida ushbu soha faoliyatiga zamonaviy texnika va texnologiyalar joriy qilinmoqda. Yoshlar, ayniqsa, o‘quvchilar 3D formatli, integral muqovali daftarlarning beqiyos imkoniyatlaridan unumli foydalanish imkoniyatiga ega bo‘lmoqda.
Izoh (0)