Олмаотада ота-онаси томонидан ўлдирилган эгизакларнинг укаси бувиси томонидан Ўзбекистонга олиб кетилди

Олмаотада ўлдирилган эгизакларнинг уч ёшли укаси Равиль Волченкони бувиси Ўзбекистонга олиб кетди, деб хабар берди «Казинформ».

Музлатгичдан топилган эгизаклар жасади бўйича олиб борилган суд ишига кўра, уларнинг кичкина укаси Равиль Волченко болалар уйига жойлаштирилган. Шундан сўнг васийлик бўлими болакайнинг Ўзбекистонда яшайдиган бувисини қидиришга тушган. У Қозоғистонга етиб келиши билан ДНК таҳлили ўтказилган ва Нурия Гильмутдинова унинг қариндоши эканлигини тасдиқланган.

«Суд Нурия Гильмутдиновани 2015 йилда туғилган Равиль Волченкога васий этиб тайинлаш бўйича ҳукм чиқарди», — дейилади расмий хабарда.

Шу билан бирга, Медеу тумани васийлик ва ҳомийлик органлари томонидан болакайнинг онаси — Алла Волченкони оналик ҳуқуқидан маҳрум қилиш бўйича ариза топширган.

Эслатиб ўтамиз, 2017 йил охирида суд Волченконинг турмуш ўртоғи, Ўзбекистон фуқароси Эмиль Гилмутдиновни максимал хавфсизлик таъминланган колонияда ўташ шарти билан 20 йилга, Волченкони — ўртача хавфсизлик таъминланган колонияда ўташ шарти билан 18 йилга озодликдан маҳрум қилган эди.