Франциянинг «Миллий фронт» партияси етакчиси Марин Ле Пенни зўравонлик саҳналари акс этган тасвирларни тарқатишда айблашди, деб ёзади Meduza. AFP прокурорларга таяниб маълум қилишича, сиёсатчи уч йилгача қамалиши ва 75 минг евро жаримага тортилиши мумкин.
Айблов эълон қилиш учун Ле Пен 2015 йилда ўз Twitter’ига жойлаган учта фотосурат асос бўлди. Уларда ИШИД жангарилари томонидан ўлдирилган одамлар акс этган эди, суратларга «Мана шу — ИШИД» деган ёзув илова қилинган эди. Шу тариқа, Ле Пен «Миллий фронт»ни ИШИДга қиёслаган франциялик журналист Жан-Жак Бурденга жавоб қайтарган эди.
Суратлардан бирида ИШИД томонидан ўлдирилган америкалик журналист Жеймс Фоулининг бошсиз танаси акс этган эди. Кейинроқ Ле Пен бу суратни Фоулининг ота-онаси сўрови билан ўчириб ташлаган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)