Американинг Netflix компанияси 2018 йилда 8 миллиард доллар сарфлаган ҳолда 700 дан ортиқ янги сериалларни тақдим этади. Бу ҳақда корпорациянинг молиявий директори Дэвид Уэллснинг сўзларига таяниб, «ТАСС» хабар берди.
Унинг сўзларига кўра, Netflix’нинг жорий йил учун умумий стратегияси олдингидек қолган. «Биз янги контент яратишни таклиф қиламиз, чунки бу янги фойдаланувчиларни жалб этади», — дейди Уэллс.
Яратилиши режалаштирилаётган киноленталар орасида суратга олиш ишлари АҚШдан ташқарида бўлиб ўтадиган 80 та картина ҳам мавжуд. Шунингдек, Netflix ўзининг маркетинг бюджетини 1,3 миллиард доллардан 2 миллиард долларга қадар оширади.
1997 йилда асос солинган Netflix интернет орқали видеолар оқимини етказиб бериш хизмати билан шуғулланади. Компаниянинг штаб-квартираси Лос-Гатосда (Калифорния штати) жойлашган. 2013 йилда буён компания ўзининг хусусий фильмларини, сериаллар ва телекўрсатувларини яратиб келади. Улар орасида «Қартадан қурилган уй», «Жуда қўрқинчли иш», «Нарко» каби ленталар мавжуд. Ўтган йилнинг июлида бутун дунё бўйлаб сервисдан фойдаланувчилар сони 100 миллион кишидан ошган.
Изоҳ (0)