Бир қатор хорижлик мутахассисларни жалб этган янги ўзбек фильми Scorpion ижодий гуруҳи суратга олиш ишларини бошлаш арафасида турибди. Бу ҳақда фильм ижодкорлари «Дарё»га хабар берди.
12 февраль куни Ўзбекистон Ёшлар иттифоқи, «Ўзбеккино» Миллий агентлиги, ички ишлар вазирлиги, Миллий телерадиокомпания, Кинематографияни ривожлантириш марказининг қўшма қарори имзоланди. Мазкур қарорга мувофиқ ўзбекистонлик ёш киноижодкорлар томонидан ёшлар тарбиясига ижобий таъсир кўрсатадиган Scorpion тўлиқ метражли бадиий фильмини суратга олиш ва унинг кенг намойиши қўллаб-қувватланади.
Фильмнинг суратга олиш ишлари мудофаа вазирлиги ҳамда Ўзбекистон Миллий гвардияси кўмагида Тошкент ва Бухоро шаҳарларида, шунингдек Россия ва Марокаш давлатларида бўлиб ўтади.
16 февраль куни фильм оператори Макс Цуи (Германия) ҳамда бошқа хорижий киноижодкорлар суратга олиш ишларини бошлаш учун Тошкент шаҳрига етиб келган.
Макс Ўзбекистоннинг қадимий шаҳри Бухоро ҳақидаги Welcome to Bukhara видеоролигига ҳам операторлик қилган.
Айни кунларда фильм режиссёри Мухлиса Азизова ижодий гуруҳ билан фильм лойиҳаси устида қизғин иш олиб бормоқда.
Изоҳ (0)