Пхёнчхан—2018. Россия хоккейчилари Чехияни енгиб, финалга йўл олди. Ҳал қилувчи ўйин немисларга қарши ўтади

Пхёнчхан мезбонлигида ўтаётган қишки Олимпиаданинг эркаклар ўртасидаги хоккей турида финал иштирокчилари аниқланди.

Ярим финалда германиялик шайбачилар Канадага қарши музга чиқиб, 4:3 ҳисобида зафар қучишга эришди. Немислар бунгача Швециядан 4:3, Швейцариядан 2:1 ҳисобларида устун кела олганди.

Финал остонасидаги иккинчи ўйинда эса россиялик хоккейчилар Чехияга имконият қолдирмади — 3:0. Ўзи учун принципиал аҳамият касб этган ўйинда АҚШ хоккей термасини 4:0 ҳисобида таслим қилган Россия, чорак финалда Норвегияни ҳам катта фарқ билан мағлуб этганди — 6:1.

3-ўрин учун Канада ва Чехия шайбачилари музга чиқади. Беллашув 24 февраль куни бўлиб ўтади. 25 февралда эса Олимпиаданинг бош соврини учун Россия ва Германия термалари кураш олиб боради.