Pxyonchxan—2018. Rossiya xokkeychilari Chexiyani yengib, finalga yo‘l oldi. Hal qiluvchi o‘yin nemislarga qarshi o‘tadi

Pxyonchxan mezbonligida o‘tayotgan qishki Olimpiadaning erkaklar o‘rtasidagi xokkey turida final ishtirokchilari aniqlandi.

Yarim finalda germaniyalik shaybachilar Kanadaga qarshi muzga chiqib, 4:3 hisobida zafar quchishga erishdi. Nemislar bungacha Shvetsiyadan 4:3, Shveysariyadan 2:1 hisoblarida ustun kela olgandi.

Final ostonasidagi ikkinchi o‘yinda esa rossiyalik xokkeychilar Chexiyaga imkoniyat qoldirmadi — 3:0. O‘zi uchun prinsipial ahamiyat kasb etgan o‘yinda AQSh xokkey termasini 4:0 hisobida taslim qilgan Rossiya, chorak finalda Norvegiyani ham katta farq bilan mag‘lub etgandi — 6:1.

3-o‘rin uchun Kanada va Chexiya shaybachilari muzga chiqadi. Bellashuv 24-fevral kuni bo‘lib o‘tadi. 25-fevralda esa Olimpiadaning bosh sovrini uchun Rossiya va Germaniya termalari kurash olib boradi.