36 йил аввал Атлантик-Сити (АҚШ)да оғир вазн тоифасида мутлақ жаҳон чемпиони унвони учун жанг бўлиб ўтди. Барча камарлар соҳиби, 21 ёшли Майк Тайсон собиқ жаҳон чемпиони Ларри Ҳолмс билан рингда тўқнаш келган. Жанг Тайсон учун оддий чемпионлик камарини ҳимоя қилиш эмас, балки принципиал жанг эди.
Бу жангнинг Тайсон учун аҳамияти тарихи саккиз йил олдин бошланган. 1980 йилда Ларри Ҳолмс, WBC йўналиши бўйича жаҳон чемпиони бўлиб турганида, афсонавий Муҳаммад Али билан жанг ўтказган. Буюк Али молиявий муаммолар туфайли икки йиллик танаффусдан кейин профессионал боксга қайтган ва айтиш керакки, у жуда яхши формасида эмасди: Алининг ёши 38 да эди ҳамда у пайтда оғир касал бўлган (бу кейинчалик аниқ бўлган). Шунга қарамай, илгари Алининг спарринг ҳамкори бўлган Ҳолмс жангга рози бўлган ва 10 раунд давомида Алини аёвсиз калтаклаган, шундан сўнг жанг тўхтатилган.
Бу жангни 14 ёшли Майк Тайсон томоша қилаётганди. Унинг учун Али нафақат кумир, балки илҳомлантирувчи боксчи ҳам эди. Табиийки, бу воқеа Темир Майкни қаттиқ ранжитган.
“У Муҳаммад Алини дўппослади ва мен йиғладим. Кейин ўзимга қасос олишим кераклигини айтдим”, — дея эслайди Майк Тайсон.
Тайсоннинг мураббийи Кас Д’Амато ҳам ғазабда эди. У Алининг яқин дўсти бўлиб, Ҳолмсни менсимасди. Жангдан кейинги куни Д’Амато Муҳаммадга қўнғироқ қилиб, “Дилетант сени шу ҳолга солишига қўйиб бердинг”, — деб танбеҳ берган. Шунда Кас 14 ёшли боксчини тайёрлаётганини ва у келажакда жаҳон чемпиони бўлишини айтган. Тайсон ҳам Кас ва Муҳаммад Алига Ҳолмсдан қасос олишга ваъда берганди.
Майк бу ваъдани йиллар давомида ёдида сақлади. Кас Д’Амато Майкнинг Ҳолмс билан жангига қадар ҳаётдан кўз юмди, лекин Тайсон ўз ваъдасини унутмаганди. Қизиқ томони, Ҳолмснинг тақдири Муҳаммад Алининг тақдирига жуда ўхшаш бўлди. Тайсонга қарши жангдан икки йил олдин Ҳолмс фаолиятини якунлаганини эълон қилган, аммо кутилмаганда 38 ёшида профессионал рингга қайтган ва Тайсон билан жанг қилганди.
Танаффусга қарамай, Ҳолмс ёш Тайсонни мағлуб этишга тайёрлигини айтиб, унга нисбатан турли ҳақоратлар ёғдирган. Майк эса бунга муносабат билдирмаган, аммо унинг рингда унинг нигоҳлари жангга фақат ғалаба учун эмас, балки Ҳолмсни йўқ қилиш учун чиққанини билдирарди. Жангдан олдин рингга меҳмон сифатида таклиф қилинган Муҳаммад Алининг чиқиши эса Майкнинг ҳиссиётини янада кучайтирган. Буюк Али Ларри Ҳолмсни кутиб олиб, кейин Тайсонга: “Уни йўқ қил”, дейди.
Бокс олами ҳали бундай мотивацияга эга Тайсонни кўрмаганди. Майк, ҳатто, ўзининг илк чемпионлик жангига ҳам бундай руҳий тайёргарликда чиқмаган эди. Унинг ғазаби ва аламини йиллар давомида кўнглида сақлаб келаётгани рингда ўзини намоён қилди. Жангнинг дастлабки сонияларидаёқ Ларри қандай аҳволда эканини тушунди ва омон қолиш учун ҳаракат қилди. Тайсон ўзига хос услубда тез-тез яқинлашиб, Ҳолмсга кучли зарбалар билан ҳужум қиларди. Ларри жеб билан ҳимояланмоқчи бўлиб, ринг бўйлаб югурган ва имкон туғилганда клинчдан фойдаланишга ҳаракат қилган. Аммо Тайсон ҳужум қилишда давом этиб, ҳар бир зарбани куч билан бериб, собиқ чемпионни дўппослаган.
Тўртинчи раундда Тайсоннинг кучли зарбаси Ҳолмсни ерга йиқитган ва бу эса жангнинг интиҳоси яқинлигини билдирарди. Ларри қийинчилик билан ўрнидан турган, лекин Тайсон унга яна бир неча зарба бериб, иккинчи марта йиқитган. Ҳолмс яна ўрнидан турган, лекин Тайсон собиқ чемпионни дўппослашда давом этган. Ниҳоят, Тайсоннинг зарбаларидан бири Ҳолмсни ерга йиқитган ва у қайтиб турмаган.
Собиқ чемпион рингда шафқатсизларча ер тишлатилганди. Тайсон Муҳаммад Алининг кўз ўнгида ўз ваъдасини бажарган. Майк Ларри Ҳолмсни нокаут қилган биринчи боксчи бўлди ва бу орқали собиқ жаҳон чемпионини рингда хор қилди.
“Қайси нокаут билан фахрланаман? Албатта, Ларри Ҳолмс билан жангдаги нокаутим билан”, — деган эди Майк Тайсон интервьюларидан бирида.
Аввалроқ “Дарё”да Майк Тайсонни бутун дунёга танитган жанг ҳақидаги мақола ҳам таржима қилинган эди. 1986 йили бўлиб ўтган жангда биргина зарба билан Майк Тайсон Тревор Бербикни уч марта йиқилишга мажбур қилиб супероғир вазн тоифаси тарихидаги энг ёш чемпионга айланганди.
Мавзуга доир: Муҳаммад Али учун қасос: Тайсонни дунёга танитган жанг ҳақида биласизми? (видео)
Изоҳ (0)