Жорий йилнинг 5—16 февраль кунлари Беларусь республикасининг фуқаро муҳофазаси университети қошидаги қайта тайёрлаш ва малака ошириш институтида Ўзбекистон ФВВ ходимлари учун «Баланд бинолар, транспорт воситалари ҳамда вайрон бўлган иншоотларда авария-қутқарув ишларини ўтказиш» мавзусида ўқув курси ўтказилди, деб хабар беради вазирлик матбуот хизмати.
«Инструкторлар ностандарт вазиятларда қарор қабул қилиш, фавқулодда вазиятлар оқибатларини бартараф этишда куч ва воситаларни бошқариш, фавқулодда вазият чоғида биринчи тиббий ёрдам кўрсатиш, транспортда ва баланд иншоотларда авария-қутқарув ишларини ташкил этиш бўйича керакли йўналишларни чуқур очиб берди. Айниқса, беларуслик ўқитувчиларнинг ўз соҳасига бўлган меҳр-муҳаббати ва садоқати бизда илиқ таассурот қолдирди. Мазкур ўқув машғулотларида спорт майдончасидан, аудиторлик-лаборатория базасидан кенг фойдаланилди. Бундан ташқари, республика марказий бошқаруви ҳамда Минск шаҳри бошқармасининг ёнғин хавфсизлиги қутқарув-отряди, Беларусь ФВВ махсус отряди ва ‘Авиация’ авария-қутқарув давлат муассасида ўқув курслари ташкил этилди. Бу каби ҳамкорликдаги ўқув машғулотларнинг ташкил этилиши келажакда табиий ва техноген тусдаги фавқулодда вазиятларда тўғри ҳаракатланиш ва қутқарувчиларнинг малакасини оширишда дастуриламал бўлиб хизмат қилади», — дейди тез ҳаракат қилиш республика кўп тармоқли маркази йўриқчи-қутқарувчиси Д.Хўжахмедов.
Изоҳ (0)