Қирғизистоннинг Ўш шаҳри Ички ишлар бошқармаси «Қизил» қишлоғида жойлашган «Қилич-Бурхон» қабристонида 1978 йилда туғилган аёл беш нафар бола билан яшамоқда, деб хабар берди «Turmush.kg».
Болаларнинг икки нафари ўзиники, қолган учтаси оламдан ўтиб кетган опасининг фарзандларидир. Болалар Ўш шаҳридаги мактабда таҳсил олади.
Гулжахон исмли ушбу аёлнинг айтишича, унинг отаси қабристонда гўрков бўлиб ишлаган. Қабристон ёнидан оиласи учун уй қурган. Гулжахоннинг маълум қилишича, фарзандларининг ҳужжати йўқ.
«Ер участкаси ҳужжатларини расмийлаштиришга ёрдам беришса яхши бўларди. Болаларнинг ҳам ҳужжатлари йўқ. 1-синфда ўқийдиган ўғлим мактабга ҳеч қандай ҳужжатсиз қабул қилинган. Паспорт столига борганимда ваъда бериб қайтариб юборишди, бироқ ҳеч нима ҳал бўлмади. Ҳар куни у ерга қатнашимга шароитим йўқ. Отамдан қолган эски уйда беш нафар бола билан яшайман, уларнинг уч нафари марҳум опамнинг фарзандлари. У бундан 4 йил олдин оламдан ўтган, турмуш ўртоғи эса бошқага уйланиб кетди», — дейди аёл.
Гулжахон ўзининг фамилиясини айтишни истамади. Гулжахоннинг сўзларига кўра, у болалар билан қабристонда яшашдан қўрқмайди. Шу билан бирга Ўш шаҳри ИИБнинг аниқлашича, мазкур уй қабристон ичида эмас, унинг чегарасида жойлашган. Бироқ уй ҳам, ер участкаси ҳам расман рўйхатдан ўтказилмаган.
Изоҳ (0)