Навоий вилоятида 10 та экоқўриқхона ташкил этилади

Фанлар Академиясининг Навоий вилоят бўлими қишлоқ туманларида бир қатор истиқболли лойиҳаларни амалга оширмоқда. Бу ҳақда «Халқ сўзи» хабар берди.

Кармана туманида муваффақиятли синовдан ўтган ғўзанинг «Порлоқ-2» нави шулардан биридир. Конимех туманида фаолияти йўлга қўйилган илмий-амалий станция эса майда шохли молларни қишки мавсумда озиқлантириш, яйловлар самарадорлигини ошириш муаммолари билан шуғулланмоқда.

Бундан ташқари, 10 та ҳудудда ҳар бири юз гектарлик экоқўриқхоналар ташкил этиш режаси ишлаб чиқилиб, тасдиқланди. Мазкур қўриқхоналарда саксовул ва чўлнинг иссиқ-совуғига чидамли озуқабоп ўсимликлар экилиб, ёзда ундан асаларичилар, қишда эса чорвадорлар фойдаланади.

Шунингдек, органомаъданли ўғитлар яратиш лойиҳаси ҳам маъқулланди. Унга кўра, Қизилқум фосфоритлари базасида маҳаллий ўғитнинг янги турини тайёрлаш йўлга қўйилмоқда.

Айни кунларда эса «Серҳосил» биологик ўғити устида иш олиб борилмоқда. Мазкур ўғит билан ўсимликлар барглари орқали озиқлантирилади.