ОАВ: «Аҳмадбой иши» бўйича суд ҳукми қачон эълон қилиниши номаълум

Ўзбекистон тарихидаги энг машҳур молиявий пирамидани қурган чинозлик Аҳмадбой (Аҳмаджон Турсунбоев) ва унинг шерикларига нисбатан суд ҳукми қачон эълон қилиниши ҳозирча номаълум. Бу ҳақда бир қатор ОАВлар хабар бермоқда.

«Kun.uz»нинг ёзишича, жиноят ишлари бўйича Тошкент вилоят судида судья Дилшод Комилов раислигида Аҳмадбой ва унинг олти шериги устидан маҳкама жараёни давом этмоқда.

Суд жараёни 2017 йил 2 августда бошланган бўлиб, судланувчилар Жиноят кодексининг 177-моддаси 3-қисми «а» ва «б» банди (валюта қимматликларини ноқонуний йўл билан олиш ёки сотиш), 188-моддаси (давлат рўйхатидан ўтмасдан тадбиркорлик фаолияти билан шуғулланиб, жуда катта миқдорда назоратсиз даромад кўриш), 189-моддаси (савдо қилиш ёки хизмат кўрсатиш қоидаларини бузиш), 190-моддаси 2-қисми «а» ва «в» (лицензиясиз фаолият билан шуғулланиш) бандларида кўзда тутилган жиноятларни содир этганликда айбланмоқда.

2018 йил 16 февраль куни судланувчиларнинг барчасига сўнгги сўзни айтиш имкони берилди. Унда, жумладан, Аҳмадбойнинг ўзи ҳеч қачон ҳеч кимни алдамаганини таъкидлаган бўлса, унинг куёви Олмос Қўчқоров «эски тизимдаги тергов жараёнидаги баъзи тазйиқлар сабабли барча айбни ўз бўйнига олгани»ни айтиб ўтганди.Судланувчиларнинг сўнгги сўзларидан сўнг, суд маслаҳатга кириб кетган эди. Дастлабки хабарларда «Аҳмадбой иши» бўйича суд ҳукми 19 февраль куни эълон қилиниши айтилган эди. Бироқ, сўнгги маълумотларга кўра, суд ҳукмини эълон қилиш номаълум муддатга қолдирилган. Нима сабабдан қолдирилгани маълум эмас.