Тошкент вилояти ИИБ миграция ва фуқароликни расмийлаштириш бўлими томонидан ногирон, ёши улуғ кексаларга фуқаролик паспорти уларнинг уйига бориб топширилмоқда. Бу ҳақда ЎзА хабар берди.
Соҳа ходимлари фуқаролик паспорти учун зарур бўлган расм ва бармоқ изларини олишга мўлжалланган мобил қурилма воситасини аҳоли хонадонларига олиб бориб, хизмат кўрсатмоқда.
Зангиота туманидаги «Сортепа» маҳалла фуқаролар йиғинида яшовчи, ногиронлиги бўлган Абдураҳмон Ортиқбоевга ҳам туман прокуратураси ва ички ишлар бўлими ходимлари томонидан фуқаролик паспорти топширилди.
— Мутахассислар имкониятим чекланганлигини ҳисобга олиб, мобил қурилма ёрдамида уйимда тез фурсатда қулай хизмат кўрсатди. Ҳеч қандай ортиқча оворагарчилик, қийинчиликлар бўлмади. Уларнинг беминнат ёрдами билан бугун янги фуқаролик паспортимни қўлимда ушлаб турибман , – дейди А.Ортиқбоев.
Изоҳ (0)