Наманганда илк бор эгилган умуртқа поғонаси тўғриланди. Бунинг учун 4 соат давом этган ортопедик жарроҳлик амалиёти ўтказилди, деб хабар беради Namangan Today.
Ҳозиргача шу каби мураккаб операциялар Тошкент шаҳрида амалга ошириларди. 15 февраль куни бундай юксак тиббий маҳорат талаб этадиган ишга вилоятда илк бор қўл урилди. Уни вилоят кўп тармоқли тиббиёт маркази бош врачи, тиббиёт фанлари номзоди Зафар Холов ҳамкасблари билан биргаликда уддалади.
Уйчилик бемор, 20 ёшли Маҳбуба Юнусова ҳушига келганида, унинг яқинлари кўп йиллик орзу-ниятлари ушалгани билан табриклади. Маҳбуба энди барча тенгдошлари қатори қаддини тик тутиб юриш бахтига муяссар бўлди. Етти йиллик армон ва азоб энди ортда қолди.
— Бош врачимиз Зафар Солиевич 2017 йил сентябригача Республика травматология ва ортопедия илмий-текшириш институтида фаолият юритган, ўз соҳаси бўйича Россияда бир неча бор малака ошириб келган, — дейди жароҳат оқибатларидан сўнгги ортопедия-артрология бўлими бошлиғи Ёсинхон Фахриддинов. — Наманганга ишга юборилиши билан бу ерда беморларга пойтахтдагидек шароитларни яратиш, илм-фан, амалиёт ютуқлари ҳамда илғор тажриба ва маҳоратларини дадил қўллаш ҳаракатида. Умуртқа поғонасининг 4-даражали сколиозини ўнглаш бўйича янги операцияда ёнма-ён турар эканман, биз ҳам устозлар изидан бораверсак, беморларга нафимиз янада кўпроқ тегишини ҳис қилдик.
Изоҳ (0)