Ўзбекистонда тут баргидан чой ишлаб чиқариш корхонасини қуриш бошланди. Бу ҳақда «Ўзбекипаксаноат» уюшмаси вакиллари маълум қилди, деб хабар беради ЎзА.
Декабрь ойида ишга тушиши кутилаётган ва умумий қиймати 2 миллион доллар баҳоланган бу лойиҳа хитойлик инвесторлар билан ҳамкорликда амалга оширилади.
Лойиҳанинг 1 миллион доллари «Ўзсаноатқурилиш» банкдан олинган кредит ҳисобидан қопланади. Қолган қисмини хитойлик чой ишлаб чиқарувчи тадбиркор мутахассислар ва ускуна олиб келиш ҳисобидан қоплайди.
2019 йилда ҳар гектар тутзордан 52,5 тонна тут барги йиғиб, чой тайёрлаш режалаштирилган. Экспорт ҳажми 1,4 миллион доллар бўлиши кутилмоқда. Корхонада 50 та доимий ва 1500 та мавсумий иш ўрни яратилади.
Уюшма томонидан тут барглари Хитойга олиб борилиб, ундан синов тариқасида чой ишлаб чиқарилган эди.
Лаборатория синовларида бундай чойнинг таркибида кофеин ва танин моддаси одатдаги чой нисбатан 200 баробар кам эканлиги аниқланди. Таркибидаги витамин ва минераллар эса, аксинча, кўп. B1, B2, А, C витаминлар, соч ва тирноқ учун фойдали кальций бор. Ундаги кальций моддаси творогдагидан ҳам кўпроқ экани аниқланди.
У қандли диабетда, бош оғриганда, бош айланишида, йўталда, кўз шамоллаганда фойдали. Шунингдек, қон босимини туширишда ёрдам беради.
Изоҳ (0)