Фанлар академияси Ботаника институти директори, академик Комилжон Тожибоев Наманган вилоятидаги ўқув муассасаларида ўқувчи ва талабалар билан учрашувлар ўтказмоқда. Бу ҳақда ЎзА хабар берди.
Наманган давлат университети, ушбу олий ўқув юрти қошидаги академик лицей ва Наманган шаҳридаги 57-умумтаълим мактабида бўлиб ўтган ана шундай тадбирлар ёшларда катта таассурот қолдирди. Тўрақўрғон тумани, Шаҳанд қишлоғида туғилиб ўсган ёш академик билан учрашувлар самимий ва мазмунли ўтди.
Олим ёшларга 2002—2010 йилларда жаҳон ботаника фани даражасидаги дастлабки йирик натижаларига эриша бошлаганини ҳикоя қилди. Жумладан, 2009 йилда Наманган вилоятининг Чоркесар ва Чодак қишлоқлари атрофида олиб борилаётган дала тадқиқотлари давомида Қурама тизмасининг баландтоғ минтақасида ҳали фанга номаълум бўлган ўсимлик тури кашф этилди. Бу соябонгулдошлар оиласига мансуб ўсимлик бўлиб, унга кейинчалик бурмақорабаргли қурама соябонгули (Курамосcиадум cорйдалифолиум) номи берилди.
Бу кашфиёт ўзининг аҳамиятига кўра, Ўзбекистонда охирги бир аср давомидаги учта йирик илмий янгиликнинг бири ҳисобланади. Умуман, академик раҳбарлик қилаётган ботаник олимлар гуруҳи томонидан фан учун янги бўлган 40 дан ортиқ ўсимлик тури кашф этилди. Уларнинг аксарият қисми Фарғона водийси, хусусан, Наманган вилояти адирлари, тоғли минтақаларидан топилган.
Изоҳ (0)