Ўзбекистонда илғор хорижий тажрибани ўрганиш асосида «Жамоат тартибини сақлашда фуқароларнинг иштироки тўғрисида»ги қонун қабул қилинади. Бу Президент Шавкат Мирзиёевнинг «Тошкент шаҳрида жамоат тартибини сақлаш, ҳуқуқбузарликлар профилактикаси ва жиноятчиликка қарши курашишнинг сифат жиҳатидан янги тизимини жорий этиш тўғрисида» қарорида кўзда тутилган, дея хабар беради ЎзА.
Қарор билан Ўзбекистон Ички ишлар вазирлигига:
Тошкент шаҳар ИИББнинг «102» ягона телефон рақами бўйича келиб тушаётган жиноятлар тўғрисидаги ариза, хабар ва бошқа маълумотларни терговга қадар текшириш якунлари бўйича қабул қилинадиган жиноят иши қўзғатишни рад этиш тўғрисидаги қарорларни расмийлаштиришнинг соддалаштирилган тартибини ишлаб чиқиш ва тасдиқлаш;
Вазирлар Маҳкамасига Тошкент шаҳрида транспорт воситалари ҳайдовчилари томонидан тўхтаб туриш қоидаларини бузиш билан боғлиқ маъмурий ҳуқуқбузарликлар тўғрисидаги ишларни юритишнинг соддалаштирилган тартибини жорий этиш тўғрисида таклифлар киритиш, бунда ҳайдовчиси бўлмаганда ҳам нотўғри тўхтаб туриш ҳолатини қайд этиш ва баённомалар тузилиши назарда тутиш;
Мувофиқлаштириш бошқармалари ва ички ишлар бўлимлари ходимларини босқичма-босқич табел ўқотар қуроли ўрнига қўллашнинг қатъий тартиби ва шартларини белгилаган ҳолда электрошок воситалари билан таъминлаш тўғрисида Вазирлар Маҳкамасига таклифлар киритиш топширилди.
Тошкент шаҳар ҳокимлигига ички ишлар бўлимлари ходимлари, биринчи навбатда, профилактика инспекторлари ва тезкор вакилларини дастурий таъминот ўрнатилган ва маълумотлар базаларига уланган планшетлар билан таъминлаш, шаҳарнинг йирик бозорлари ва савдо мажмуаларида ички ишлар органлари томонидан хизмат кўрсатиш бўйича шартномалар тузиш чораларини кўриш юклатилди.
Изоҳ (0)