Термиз шаҳар тиббиёт бирлашмаси туғруқ мажмуасида юз берган нохуш ҳолат Сурхондарё вилоятида шов-шувларга сабаб бўлди. Бу ҳақда ЎзА хабар берди.
Вилоят ИИБ матбуот хизматига кўра, Термиз туманида яшовчи Ш.Р. опаси ва отаси билан аввалдан тил бириктириб, чақалоғини 20 миллион сўмга сотишга келишади. «Хамир учидан патир», дея ушбу маблағнинг 150 минг сўмини «харажат» учун олдиндан олиб қўяди.
23 яшар аёл опаси ва отаси билан Термиз шаҳар тиббиёт бирлашмаси туғруқ мажмуаси ҳовлисида келишилган пулнинг 14 миллион 500 минг сўмини олиб, уч кунлик норасида чақалоқни мижозга топширмоқчи бўлганида ҳуқуқ-тартибот идоралари ходимлари томонидан ушланди.
Туғруқ мажмуасининг икки шифокори ҳам оқ халатига доғ туширди. Улар суюнчиси ва чақалоқни олиб чиқиб кетиш учун деб, Ш.Р.нинг мижозидан 420 минг сўмни олаётганида қўлга тушди.
Айни пайтда ўз фарзандини пуллашга уринган Ш.Р.га нисбатан Жиноят кодексининг тегишли бандлари билан жиноят иши қўзғатилиб, тергов-суриштирув ишлари олиб борилмоқда.
Изоҳ (0)