Апрель ойидан Самарқанд кўчалари бўйлаб даблдекерлар ҳаракатлана бошлайди

Жорий йилнинг апрель ойидан бошлаб Самарқандда машҳур даблдекерларнинг (икки қаватли автобус) ҳаракатини йўлга қўйиш режалаштирилган, деб хабар берди «Anhor.uz».

Бу каби қарорга шу турдаги экскурсиялар Тошкентда ўзини оқлаганидан сўнг келинган. Бугунги кунда «икки қаватли» экскурсия пойтахт бўйлаб 2,5 соат айланиб, туристларга шаҳарнинг диққатга сазовор жойларини кўздан кечиришларида ёрдам беради. Автобуслар ҳар икки соатда «Ўзбекистон» меҳмонхонаси ёнидан жўнаб кетади.

«Автобуслар Самарқанднинг диққатга сазовор жойлари, унинг сирлари ва афсоналари ҳақида туристларга саккиз тилда сўзлаб бера оладиган аудиогид билан жиҳозланади. Бундан ташқари туристлар анъанавий Самарқанд ошхонасидан баҳраманд бўлиши мумкин. Бу каби даблдекерлар хизматидан кейинчалик республиканинг бошқа вилоятларида ҳам фойдаланиш режалаштирилган», — дейди Давлат туризм қўмитаси вакили.

Даблдекер сифатида шу турдаги автобуслар ишлаб чиқаришда дунёдаги энг йирик компаниялардан бири ҳисобланувчи ва ўз маҳсулотларини Ўзбекистон шароитига мослаштирган Хитойнинг Higer брендидан фойдаланилади.

Масалан, Европада бу каби автобусларнинг баландлиги 4,3—4,4 метрни ташкил этади, бироқ Ўзбекистон норматив базасига кўра, унинг баландлиги 4 метрдан ошмаслиги керак.