Joriy yilning aprel oyidan boshlab Samarqandda mashhur dabldekerlarning (ikki qavatli avtobus) harakatini yo‘lga qo‘yish rejalashtirilgan, deb xabar berdi “Anhor.uz”.
Bu kabi qarorga shu turdagi ekskursiyalar Toshkentda o‘zini oqlaganidan so‘ng kelingan. Bugungi kunda “ikki qavatli” ekskursiya poytaxt bo‘ylab 2,5 soat aylanib, turistlarga shaharning diqqatga sazovor joylarini ko‘zdan kechirishlarida yordam beradi. Avtobuslar har ikki soatda “O‘zbekiston” mehmonxonasi yonidan jo‘nab ketadi.
“Avtobuslar Samarqandning diqqatga sazovor joylari, uning sirlari va afsonalari haqida turistlarga sakkiz tilda so‘zlab bera oladigan audiogid bilan jihozlanadi. Bundan tashqari turistlar an’anaviy Samarqand oshxonasidan bahramand bo‘lishi mumkin. Bu kabi dabldekerlar xizmatidan keyinchalik respublikaning boshqa viloyatlarida ham foydalanish rejalashtirilgan”, — deydi Davlat turizm qo‘mitasi vakili.
Dabldeker sifatida shu turdagi avtobuslar ishlab chiqarishda dunyodagi eng yirik kompaniyalardan biri hisoblanuvchi va o‘z mahsulotlarini O‘zbekiston sharoitiga moslashtirgan Xitoyning Higer brendidan foydalaniladi.
Masalan, Yevropada bu kabi avtobuslarning balandligi 4,3—4,4 metrni tashkil etadi, biroq O‘zbekiston normativ bazasiga ko‘ra, uning balandligi 4 metrdan oshmasligi kerak.
Izoh (0)