Жанубий Корея ўз мамлакатининг ҳудудида иккита концерт берадиган Шимолий кореялик артистларга ҳеч қандай молиявий мукофот бериш ниятида эмас. Бу ҳақда Сеулда бўлиб ўтган брифингда бирлашган вазирликнинг расмий вакили Пэк Дэ Хён маълум қилди, деб хабар берди «ТАСС».
«Давлат айни вақтда концертларга кетадиган маблағни ҳисоблаш билан шуғулланмоқда. Артистларнинг чиқиши учун пул тўлаш кўзда тутилмаган», — дея таъкидлади Пэк Дэ Хён. Унинг айтишича, кўрсатилган чекловлар БМТ Хавфсизлик Кенгаши томонидан КХДРга қарши санкция режимида белгилаб қўйилган.
КХДРлик артистларнинг концерти 8 февраль куни Канниндаги санъат марказида, 11 февралда эса Сеулдаги миллий театрда бўлиб ўтади. Бу каби келишувга Хён Сон Воль бошчилигидаги Шимолий Корея делегациясининг «жануб»га ташрифидан сўнг эришилган.
Аввалроқ, Олимпиада ўйинлари — 2018 нинг ташкилотчи қўмитаси «шимоллик» атлетларга Samsung Note 8 смартфонини совға қилмасликка қарор қилган эди. Жанубий Корея ОАВлари қўмитанинг мазкур қарорини телефон орқали интернетга кириш мумкинлиги, бу эса КХДР қонунлари билан тақиқлангани билан изоҳлаганди.
Изоҳ (0)