Тинч океанининг Кирибати қирғоғи яқинида чўкиб кетган паром ичида 88 киши бўлган, уларнинг 23 нафари мактаб ўқувчиларидир. Бу ҳақда Янги Зеландия радиосига таяниб, «ТАСС» хабар берди.
«Мавжуд маълумотларга кўра, паром бортида 10 нафар кичик синф ўқувчилари ва 13 нафар ўрта ҳамда катта мактаб ўқувчилари бўлган», — дея аниқлик киритади радио. Қутқарув операциялари ҳамон давом этмоқда, бироқ иштирокчиларнинг тан олишича, одамларни топиш имконияти борган сари камаймоқда. Кирибати ҳукумати бедарак йўқолганлар учун бир ҳафта миллий илтижо кунини эълон қилди.
Унчалик катта бўлмаган МВ Бутираои пароми Ноноути оролидан 18 январь куни йўлга чиққан ва орадан икки кун ўтгач 280 километр узоқликдаги Тарава оролига етиб келиши лозим бўлган. Кирибати ҳукумати паром белгиланган манзилга етиб келмаганидан фақатгина орадан бир неча кун ўтгач хабар топган. Паром учун ҳеч қандай чипта сотилмагани, пул тўлаганлар бортга шундоқ чиқариб юборилгани сабаб бедарак йўқолганлар сонини аниқлаш анча мушкул кечди.
Ноноути маҳаллий кенгаши аъзолари оролдаги барча уйларни текшириб чиқиш натижасида бедарак йўқолганлар сони 88 нафар кишига тенг эканлигини аниқлади.
Изоҳ (0)