Айни пайтда Янгийўл шаҳридаги Усмон Юсупов уй-музейи фондида 4 мингга яқин ноёб буюмлар сақланаяпти. Ушбу манзилда 20 йил яшаган, 1937—1950 йилларда республиканинг биринчи раҳбари бўлиб ишлаган Усмон Юсуповнинг ҳаёти ва фаолиятидан ташқари, яқин ўтмиш ҳақида ҳам қизиқарли маълумотлар тақдим этади, дейилади «Халқ сўзи» газетаси мақоласида.
Музей директори Сайёра Мамадалиеванинг таъкидлашича, Ўзбекистон Республикаси маданият вазирлиги тасарруфидаги мазкур даргоҳ таъмирдан чиқарилганидан сўнг бу ерга келувчилар сони ошган. Хусусан, ўтган йили масканга 12 мингга яқин одам ташриф буюрди. Улар учун экскурсиялар ташкил этилди. Музейнинг бешта бадиий безатилган зали кўпчиликда яхши таассурот қолдирди.
«Йиллик ҳисоботда келтирилган бу рақамнинг кам ёки кўплиги масаланинг иккинчи томони. Ажабаларли ҳолат эса музейга келаётганларнинг аксарияти — янгийўллик ёшлар. Бу муассаса маъмуриятининг тумандаги мактаб ва коллежларда олиб бораётган тарғибот-тушунтириш ишлари самарасидир эҳтимол. Лекин ҳақиқат шуки, музей ҳозирча фақат янгийўлликларга хизмат кўрсатаяпти, холос», — дейилади мақолада.
«Шу маънода, музейга келувчилар географиясини кенгайтириш — муҳим масалалардан бири! Бунинг учун тарғибот ишларини кучайтириш, лозим топилса, уй-музейини сайёҳлик йўналишлари қаторига киритиш мақсадга мувофиқдир», — дея хулоса қилинади мақолада.
Изоҳ (0)